無綫戀綜《女神配對計劃 最後告白》昨晚（14日）圓滿結束，女神們及求愛勇者們昨晚與幕後工作人員齊齊食飯睇大結局。葉蒨文（Sophie）與羅毓儀（Yuki）成功配對，與心儀求愛勇者曾展望（GM）及林俊其（Kris）成真正CP。GM更對着Sophie連講3次「我愛你」，之後來個霸道總裁式「世紀之吻」，加上Sophie興奮到「開心揼地尖叫」，成為全晚熱話。
Sophie與GM配對成功後，主動提議玩「同心鎖」，為這次難忘的浪漫配對旅程留下美好回憶：「呢幾個月我哋都經歷咗好多嘢，我好想同你寫低…我哋嘅感想，跟住喺度留低一個回憶。」Sophie選擇寫下的，是她在第一天海選時說過的霸氣Bite：「我唔需要嗰5秒。」至於GM寫下的則是一生不變愛的承諾：「你係第一個，（亦係）最後一個我會想用盡全力保護嘅人。」
網民大讚GM愛得真摯、勇敢又霸氣，並直指二人的「配對」已直接昇華至求婚甚至結婚現場，而官網上的「霸氣世紀之吻」精華節錄，亦於短短一晚已吸獲過萬Likes及衝破200萬點擊，相當犀利！網民紛紛留言表示感動及祝福：「我愛你，一個男人肯喺屏幕前對住幾百萬人講，其實係押上自己喺娛樂圈嘅前途」、「真係好癲，好似求婚咁」，又指兩人是張家輝和關詠荷2.0，更令人驚喜的是來自18個城市的CP粉絲，為他們準備了一個「官宣應援」在旺角投放。
在慶功宴現場成功配對的CP，以不同形式進行「愛的官宣」，GM與Sophie應全場要求即場還原世紀之吻，原本GM有點害羞，不斷採取拖字訣，但最後敵不過全場起哄，二人在熱鬧的10秒倒數聲音下錫錫，但當倒數至3時，Sophie突然向後縮兼怕醜地雙掩面，獲監製起哄大叫：「要重頭嚟過！」GM聞言搞笑崩潰大叫：「夠喇！」可惜還是遭監製再三要求重做，最終GM搞笑向監製下戰書：「你再講我錫你呀！」場面混亂又搞笑，幾經喧鬧，GM極速連錫4次Sophie的額頭，並在監製又起哄下連錫女方面珠仔4次，全程甜到漏！
眾人看完大結局後，再前往After Party，席間兩人再被起哄要求錫錫，今次輪到Sophie霸氣捧GM臉強行吻向GM面珠，受寵若驚的GM笑言要「飲水定驚」，二人在徇眾要求下手拖手合唱GM海選時的面試歌曲《情非得已》。
Sophie被問到為何在「最後告白」中「一秒轉身」鎖定GM，她笑言：「因為由開始到依家都考慮咗好耐啦嘛，咁我覺得我個人就係『係就係，唔係就唔係！』決定咗就做囉！」GM則坦言未被揀中一刻，心情都依然忐忑：「我都囉囉攣…其實我都唔係講咗好多嘢，因為我當時好亂。」兩人又甜蜜謝票，Sophie稱一開始知道要做真人騷，就已經想送份禮物畀觀眾：「就係『真』！的確有啲戀綜係有劇本嘅，咁我覺得自己作為一個藝人，送畀觀眾嘅嘢就係真實感。所以全程我都堅持係…真實咁去感受，將自己成個人揼晒落嚟嘅，我希望你哋會鍾意我送畀你哋嘅呢份禮物，多謝你哋一路支持！」
