【On.cc】曾比特強勢加盟英皇娛樂　告別「爆炸頭」晒六舊腹肌

歌手曾比特（Mike）趁今日（7日）生日於社交平台宣布正式加盟英皇娛樂，並上載全新造型照，他放棄標誌性的「爆炸頭」兼大晒六舊腹肌，原來Mike每個星期做足六日Gym，無論當日工作與否都風雨不改每次做足兩個鐘，展現新開始的決心！

曾比特宣布正式加盟英皇娛樂。

提到加盟新公司契機，Mike指一切都是緣分：「係一個好自然嘅過程，雙方對音樂嘅理念好夾，感覺啱Channel，所以就決定一齊開展音樂新旅程啦！」講到何時推出新歌，他直言慢工出細貨：「想俾大家見到唔一樣嘅曾比特，所以喺揀歌上面都花咗唔少時間，希望呈現到一個最好嘅效果畀大家。」

曾比特上載全新造型照。

不過他亦應承粉絲會加快速度，至於開騷，Mike則霸氣回應：「絕對會！」但他亦十分老實說：「現階段歌曲嘅數量都比較不足，所以大家畀少少時間我，先用唔同嘅新歌去轟炸大家，等所有嘢準備好就會同大家開一個盛大嘅party。」他笑言已經問定老闆楊受成：「我已經事先問定老闆，老闆應該叫我去啟德唱，希望唔係啟德地鐵站，哈哈！」他又強調：「我覺得我係Live型歌手，一直好想透過Live同大家近距離接觸，將我嘅音樂上嘅能量傳遞畀大家。」

曾比特放棄標誌性的「爆炸頭」兼大晒六舊腹肌。

提到公司眾多猛人，最想跟哪一位合作，他竟然將目標指向老闆：「希望可以同老闆合作出一首歌，因為平時都係聽老闆演講，但係甚少聽佢唱歌，所以我希望今次我入到嚟可以令老闆開金口，哈哈！」這願望認真特別！他續說終極期望是跟公司每一位都合作一次。

曾比特前途無可限量。