高利巴尼「麻煩友」就係人都知，分組賽最後一輪對陣比寧試過領紅牌嘅佢，停賽至1/4決戰先解禁復出，結果喺對陣馬里嘅賽事中完場前補時階段領黃牌。今日凌晨嘅準決賽對陣埃及又早喺16分鐘就「染黃」，難怪直播旁述都提場「佢似乎唔記得咗自己孭住張黃牌咁啵！」加上22分鐘傷出，即係無論點，決賽都唔會見到佢有機會上陣。其實塞內加爾踢得好耐心同進取，傳球組織都好細緻。至於文尼78分鐘嘅入波都幾突然，卡馬拉嘅遠射吸引對方兩名防守球員押前封堵，結果皮球省中其中一位後折射到無人看管嘅文尼腳下，可以睇定再射入近柱，處理相當冷靜，賽後都會選為全場最佳。對比上一仗嘅龜縮戰術，埃及再次施展喺塞內加爾身上就似乎唔多奏效。全隊嘅控球率只有37%，更甚嘅係全場僅有嘅2次埋門，第一次攻門需要去到84分鐘先出現，而去到傷停補時階段馬莫殊嘅攻門先得以中目標。可以話埃及今仗輸得心服口服，而沙拿喺同前利物浦隊友文尼之間嘅對決亦都徹底敗陣。摩洛哥嘅攻擊線從開波就不斷為尼日利亞防線施壓，艾查爾（Semi Ajayi）早段幾乎釀成大錯，幸好自己執返攤「蘇州屎」，成功封堵沙巴利（Ismael Saibari）嘅埋門。佢同巴斯（Calvin Bassey）嘅中堅組合及後時間表現都好穩健，後者喺處理高空波相當出色。左閘安耶馬治（Bruno Onyemaechi）全場受到巴謙戴亞斯以及艾舒拉夫嘅連番衝擊，對佢體能消耗極大，未知係未呢個原因導致佢喺十二碼決勝發揮失準。另外龍門尼華巴利（Stanley Nwabali）表現好好，全場作出最少5次成功封阻，未能協助球隊晉級相當可惜。摩洛哥今屆第6場賽事，翼鋒巴謙戴亞斯目前為止唯一一場與入球擦肩而過。摩洛哥佔據場上主導，不過就得勢不得分。獲選全場最佳嘅邦奴喺十二碼決勝救出對方兩次攻門成為球隊獲勝關鍵。決賽將會由塞內加爾挑戰主辦國嘅摩洛哥，至於季軍戰就由埃及對陣尼日利亞。非洲國家盃準決賽賽事賽果-塞內加爾🇸🇳1-0 🇪🇬埃及尼日利亞🇳🇬0-0（pk: 2-4）🇲🇦摩洛哥 🌍⚽️🏆🇲🇦