經典回眸- 1999年香港賀歲盃 準決賽 埃及3-1 保加利亞 🇪🇬🇧🇬 夏辛🆚史岱捷哥夫成為經典！

當年由嘉士伯啤酒贊助嘅賽事可謂盛況空前，政府大球場座無虛席。睇高一線嘅保加利亞勢估唔到會被埃及「法老」H夏辛大殺四方- 佢上半場梅開二度，幾乎為球隊奠定勝局。結果下半場恩文個人表現錦上添花，即便艾奧維夫追返波都無濟於事。而兩位名將之間嘅對碰，H夏辛亦取得完勝。

至於另一場由陳洪平帶隊嘅港聯迎戰強陣嘅墨西哥就更加令全場氣氛達到最高點！有白蘭高、靴蘭迪斯、柏倫西亞、柏度、甘坡斯以及佩雷斯等壓陣嘅北美雄鷹最終被港聯守和，需要十二碼分勝負。需要提及嘅係港聯嘅德保諾夫全場表現都相當出色，包括十二碼決勝負。唯獨麥基昂同吳群立宴客，墨西哥贏4-3晉級年初四嘅決賽。

而初四嘅季軍戰，有史岱捷哥夫同艾奧維夫梅開二度嘅保加利亞就意3-0大勝港聯獲得季軍。決賽方面，原本大有機會主力出戰嘅「花蝴蝶」甘坡斯，因屋企人被綁架結果倉促趕返回國而錯過同球迷見面嘅機會。但係隊友就爭足氣，一舉贏低賽事來支持呢位球隊靈魂人物。憑藉初出茅廬嘅馬昆斯，以及阿賓迪斯同靴蘭迪斯嘅入球，墨西哥以3-0擊敗最後得十人應戰嘅埃及，捧走該屆賽事冠軍🏆。而已卯年賀歲盃，亦都圓滿落幕。

细说经典