利物浦同韋斯咸上演入球大戰，兩隊防守端嘅甩漏層出不窮，但進攻端嘅把握能力就成為最大分野。沙拿依舊未能夠搵返對射門鞋，幸好伊傑迪基表現神勇。正常賽事而言，麥阿里士打嘅入波相信會入選本週金球。

韋斯咸再輸一場，唯一值得欣喜嘅係射手卡斯泰蘭奴斯總算取得今季第二粒入波。

「般尼從來不易，這個你我早已知」。原本落後到0-3力追到3-3平手，而後78分鐘嘅入波被判罰越位在先食「詐糊」。補時93分鐘被賓福特嘅唐斯加特入到4-3，以為大勢已去，殊不知般尼再次喺97分鐘追和比數，但被判罰手球犯規而入球無效，最終確定輸3-4完場。賽後佢哋積19分排尾二，同安全線相差有8分之多。

曼聯升上第三位！般奴費蘭迪斯取得喺曼聯嘅第100個助攻同第105個入波 ，係球會歷史上第三位入波同助攻都達到三位數嘅球員。卡域克兩次帶領曼聯，加埋五場聯賽主場全部取勝。薛斯高喺卡域克帶領下第一次正選上陣，並且取得入波。

四日踢兩場比賽嘅水晶宮，展現唔錯嘅競爭力。甸恩軒達臣有出色嘅表現。阿仙奴依靠兩個角球擊敗車路士全取三分，艾迪達喺今季帶領球隊針對性部署死球戰術實在令人歎為觀止。輸波嘅車路士加埋今仗近9次對壘都無辦法擊敗倫敦死敵，而佢哋今季就第9次有球員領紅牌被逐，睇嚟同9字都頗有緣份。

阿仙奴踢多場情況下，繼續有5分領先優勢。

英超第28週賽事賽果-狼隊2-0 阿士東維拉般尼茅夫1-1 辛德蘭般尼3-4 賓福特紐卡素2-3 愛華頓利物浦5-2 韋斯咸列斯聯0-1曼城白禮頓2-1 諾定咸森林曼聯2-1 水晶宮富咸2-1 托定咸熱刺阿仙奴2-1 車路士

epl英超🏴󠁧󠁢󠁥󠁮󠁧󠁿