對比前晚嘅一場，精彩程度絕對係過之而無不及。從比賽開始到結束，競爭力都明顯高一班。

柏達連奴喺加斯柏連尼嘅基礎上增加咗好多元素，而且入球轉化率亦提高唔少。今季多次提到，薩柏哥斯達值得加圖素考慮重召入意大利國家隊，而本場賽事佢嘅發揮依舊極為搶眼，上半場嘅高難度射門中楣相當可惜。沙馬錫嘅重砲令普維杜爾相當難受，柏薩歷嘅執雞正係來自前者嘅遠射而導致甩手。至於23歲美國中場梅沙（Yunus Musah），就絕對係一大驚喜！

亞特蘭大踢得更加似主場，拉素嘅表現更加似作客。但下半場迪利巴施路（Fisayo Dele-Bashiru）嘅入波，又體現咗領隊沙里嘅經驗老辣。丹尼爾馬甸尼今仗以中鋒身分上陣，呢個入波串聯佢都有份參與，過程十分精彩。戴亞（Boulaye Dia）嘅入波要多得柏薩歷嘅處理，呢位入球功臣或者可以有更好嘅選擇，但係佢就揀咗最壞嘅方式- 心口「照」俾塞內加爾前鋒射入。若非球隊終場前追和，呢位功臣絕對會變罪人。

Coppa Italia 🏆🇮🇹