先恭喜下柏達連奴（亞特蘭大）榮膺意甲工會評選二月份最佳領隊！🎉

奇雲迪布尼相隔129日之後復出，安古沙（Frank Anguissa）自從11月9號之後再次上陣。保安堅奴表現比之前穩定咗；祖安謝薩斯最後時刻喺中路嘅解圍都好關鍵。奇雲廸布尼入替之後踢右中場；維加拿半場有點受傷被換走。普列坦奴力壓拉沙路交出頭槌助攻，都好難得。艾利臣山度士左右腳盤扭、突破同射門都出色，加盟之後四場聯賽入兩球。賽後呢位巴西球員表示，佢做咗三個慶祝動作，一個係送俾母親嘅，一個係送俾兄弟嘅，另一個係自己鍾意，當中有朗拿甸奴嘅動作，因為佢係對方嘅球迷。艾馬斯取得今季聯賽第一個入波，令到拿坡里有18個球員喺聯賽取得進帳，同祖雲達斯一樣係今季最多球員入過波嘅球隊。賽後艾馬斯表示喺呢個艱難時期，呢個入波對於佢嚟講好重要，佢形容自己而家更加似一個中場球員，但係大家都知道佢更加想踢進攻中場呢個位，不過會盡力完成教練安排嘅任務，甚至踢閘都得，但進攻中場同翼鋒位置會踢得更舒服。另外，蘇格蘭中場基摩亞自從10月尾之後第一次喺聯賽正選上陣。

49個失波，拖連奴成為今季意甲失波最多嘅球隊。自從2009年5月之後，佢哋都未試過作客贏拿坡里。華錫嘅死球同埋生波處理帶嚟最大威脅，杜雲薩柏達狀態非常一般。33歲意大利守門員柏拿利可能係今季球隊最大嘅驚喜。

費倫天拿最好同最多嘅機會都落喺碧哥利身上，可惜都俾佢糟蹋咗。經歷上場對烏甸尼斯踢三中堅嘅失敗經歷之後，今場費倫天拿踢四後衛，路根尼亦都退居後備。冇摩西堅恩嘅日子，「紫百合」不妨考慮踢無鋒陣。帕爾馬守門員哥維今場應付高空波幾準繩，球隊聯賽五場不敗，三場贏兩場和。

廸羅斯倒戈，帶領熱拿亞贏羅馬。喺呢位前羅馬隊長嘅領導底下，熱拿亞嘅團隊士氣同氣氛都明顯好咗，個別球員嘅狀態同能力亦都有提高，包括前鋒哥隆保同域真亞（Vítor Manuel Carvalho Oliveira）。

羅馬方面，後衛尼迪卡（Evan Ndicka）連續三場聯賽都有波入。

AC米蘭今季對強隊嘅表現相對比較出色，相反國際米蘭就喺大戰比較遜色，今季三場同城打比全部輸曬，且一波都入唔到，賽後就仍然喺聯賽有 7 分領前優勢。

AC米蘭連續七場打比戰保持不敗，今季兩個循環都贏一比零。艾斯度賓蘭（Pervis Estupinan）自從舊年三月之後，第一次喺聯賽入波，當然上一次係英超，而家喺意甲。摩特歷、韋比奧特、麥尼安繼續係球隊嘅支柱，柏夫洛域都有高水準發揮。

勞達路馬天尼斯受傷、馬古斯杜林感冒，國際米蘭今屆聯賽第一次起用Pio艾斯普薛圖搭邦尼嘅進攻組合，但係缺乏火花；而路爾斯恩希基嘅防守意識始終比較弱。國際米蘭喺今屆好多大戰，都感覺決心差啲。

意甲第28週賽事賽果-拿坡里2-1 拖連奴卡利亞里1-2 科莫亞特蘭大2-2 烏甸尼斯祖雲達斯4-0 比薩萊切2-1 基蒙尼斯博洛尼亞1-2 維羅納費倫天拿0-0 帕爾瑪熱拿亞2-1 羅馬AC米蘭1-0 國際米蘭拉素🆚薩斯索羅（稍後時間進行）

serie a意甲 🇮🇹