戴祖儀迎31歲生日自爆收到一大堆短訊 回應死纏男藝人最新動向.無綫全新煮食節目《轟炸味蕾的廚房》今日（23日）舉行記者會，兩位主持戴祖儀同區永權首度合作亮相，與節目中四位星級名廚周世韜、李家鋌、鄭紫欣及譚詠儀同台現身。戴祖儀受訪時話今次係第一次同區永權合作，平時喺公司見面多，做嘢就係第一次，佢話做呢個節目大飽口福：「有時好嘢嘅定義係出餐廳食，但我哋呢個節目令我改觀，就係喺屋企自己街市容易買到嘅餸，只要你加多啲心思就可以整得好好食。」

尋日（22日）係戴祖儀31歲生日，佢透露未有特別慶祝：「我係去咗排舞台劇，因為呢個月實在太攰，排完舞我去咗按摩，跟住就返咗屋企瞓覺。」講到早前死纏佢兩年嘅男藝人有冇傳短訊祝賀，戴祖儀話：「因為我封鎖咗佢聯絡方式，所以都唔知。（有冇收過陌生短訊？）冇啊，我都未有時間去睇陌生訊息。同埋我都係回覆啲朋友嘅訊息，因為佢哋都傳咗一堆生日短訊俾我。」問到事件曝光後對方有冇透過身邊朋友傳話，佢就話：「我所知我身邊嘅朋友都冇收到佢信息，我諗都係時間過咗去咁樣。」

TVB