陳熙蕊與才俊街頭親熱斷正：擁抱一下好正常嘅一件事

「TVB小花」陳熙蕊（Blossom）早前被影到與一名高大斯文型男甜蜜約會，有指該名型男名為石煒麟（Arthur），與麥明詩兄妹私交甚篤，現為跨國顧問公司麥肯錫（McKinsey & Company）的全球董事合夥人兼香港區總經理。當晚約九時許，兩人在街頭相擁道別，神情依依不捨，男方更主動牽著她的手，再次摟她入懷，舉止親密，最後一同登上士離去，事件曝光後隨即惹起網上關注。今日（23日）陳熙蕊現身電視城出席無綫真人騷《魔音女團》16強名單記者會，就事件接受《香港01》訪問時表示：「其實我覺得感情嘢，我覺得暫時都係順其自然，因為我想專注喺工作上面，我覺得好難得而家入到團，呢個機會真係好難能可貴，大家畀啲空間我，遲啲有啲咩嘅話再同大家講。」

問到是否同男方了解中，陳熙蕊坦言：「了解中，因為我覺得我呢個年紀去了解下唔同人都係正常。雙方認識咗1年以上，佢係一個好好嘅男仔嚟。」被影到咁親密怕唔怕影響形象，佢話：「暫時都冇。（怕唔怕人話你隨便？）我覺得朋友之間擁抱一下，咁樣Say個Goodbye其實都好正常嘅一件事嚟嘅，希望大家留意我作品。（擔唔擔心對方多女埋身？）其實我真係冇諗咁多感情上面嘅嘢，都係想專注返工作啊。」早前陳熙蕊曾現身「十優港姐」麥明詩哥哥麥明山加盟養和醫院整形外科中心的慶祝酒會，當時被傳與男方關係非比尋常，佢隨即澄清強調只是朋友，並笑言已有了解中的對象，如今戀情疑似曝光。