《中年好聲音4》撮良緣 陶枳樽黃藝輝宣布訂婚

《中年好聲音4》仲係爭奪緊24強階段，已經成功撮合咗一段好姻緣。啱啱喺上星期播出嘅一集被淘汰出局嘅39歲黃藝輝，同喺70強止步嘅35歲前女團HunterZ成員陶枳樽，尋晚（24號）齊齊喺社交平台宣布訂婚喜訊。

陶枳樽留言話：「好多朋友知道咗節目入面求婚嘅消息，感謝大家嘅祝福。」佢感謝TVB同呢個節目令佢哋因為音樂而相遇，仲多謝黃藝輝「呢位勇士」：「由相識到而家，都給予我好安心、簡單、快樂嘅關係。作為一個每日拆解愛情文學嘅情感博主，我好清楚戀愛同婚姻係咩一回事，你嘅天然呆居然可以擊破我嘅複雜思維，用魔法打敗魔法，好佩服（笑）。未來呢，仲有好多怪獸要打，一齊加油～隊友！」

黃藝輝就留言告白：「我哋第一次見面，係喺我嘅工作室。佢嚟借錄音，亦都借走咗一整日嘅日光。溫柔、可愛、體貼——但我總係諗，一個人要經歷過幾多，先會將懂事修煉得咁自然。佢一定都好需要被人錫。

「後來比賽漸深，日子拉長成各自嘅軌道。我哋偶爾各自奔忙，卻總喺夜深時，用電話線將彼此牽返同一片月光下。傾到天色發白，傾過山川湖海，傾到發現——我哋嘅興趣、三觀、靈魂嘅紋理，竟似上輩子就做過孖寶兄弟。係互補，係吸引，係哪怕唔相愛，都注定係靈魂伴侶嘅嗰種契合。

「我哋都唔完美。我嘅稜角與缺口，自己都數唔清。但如果人生只有一次相守嘅機會，我想同佢試吓。唔為咗圓滿，只為咗將我所有唔太熟練嘅愛，都交到佢手裡。多謝Kelton牽咗嗰條線，多謝TVB《中年好聲音》令兩條平行線有咗交點。更要多謝你——陶枳樽，成為我嘅未婚妻。」

TVB