林志玲靚爆中環 親口闢謠健康警號.「台灣第一名模」林志玲與日本放浪兄弟成員AKIRA婚後長居日本，日前難得返台灣出席慈善活動，其後被影到悄悄現身台大醫院，逗留三個鐘，令外界關注佢嘅健康狀況。雖然經理人隨即回應話只係例行身體檢查，呼籲大家唔使擔心，但仍然惹起揣測。不過今日（25號）林志玲現身香港中環名店活動，狀態大勇，依然明艷照人，直接用行動為健康響警號一事闢謠。

林志玲尋日已經到埗，活動上佢接受主持訪問時透露，每次嚟香港胃口都特別好，笑住話：「我好鍾意食燉奶、煲湯同菠蘿包，我哋尋日……我食咗好多，仲俾人話咗，今日要着得落條裙。」早前佢被影到喺橫店拍古裝劇，今次係佢相隔八年再拍劇，佢希望角色可以呈現出唔一樣嘅自己，話：「呢個角色，佢係嗰個年代，包括佢所背負嘅枷鎖嘅女人，冇任何選擇，我覺得係好多當時女性嘅寫照，我希望可以呈現得好好。」

講到點樣喺家庭、事業同慈善之間切換身份，志玲坦言好多媽媽、好多女人都唔容易，佢為自己設定咗一個開關掣：「當我工作嘅時候會將開關打開，百分百面對工作，我覺得每件事當你專注嘅時候，你先能夠做得好！所以當我離開咗你哋嘅鎂光燈，就會將呢個開關關掉，專注24小時面對我嘅小朋友同家庭，我覺得咁樣會搵到一個比較好嘅平衡，全心全意將事情做到盡可能最好。」

此外，志玲透露目前人生規劃係希望對社會多啲回饋，因為回顧自己人生，對擁有嘅一切充滿感謝，所以佢話：「而家正喺度做兒少心理健康課程，我覺得要心理健康，社會先會健康起嚟，希望好好推廣，令心理健康成為兒少嘅必修課，遇到困難嘅時候有自己解決嘅能力，未來呢點可能會更加努力，亦希望能夠喺大家支持下令社會健康起嚟！」談到志玲向來好有自信、從容同優雅，佢認為除咗外在嘅運動、飲水、保持正向，重要係搵到好穩健嘅內核力量：「情緒管理，亦包括我哋每個人遇到困難時，要有解決嘅勇氣，呢啲都係內心嘅內核力量，經歷過呢啲，每個女人都可以令自己保持好嘅狀態，仲有就係唔好放棄！唔好放棄！」