蔡卓妍笑稱男友運動太勁 各有各跑唔使就時間.黃曉明、林志玲、蔡卓妍、黃宗澤、鄧萃雯、呂良偉等今早（26日）出席馬拉松活動，眾星喺台上分享對運動嘅睇法。當司儀提到鄧萃雯18歲入行，打拼咗40年，黃宗澤即刻笑問司儀「會唔會傾偈」，司儀隨即改口話鄧萃雯18歲入行，今日係佢出道第一年，場面搞笑，不過鄧萃雯都冇介意，笑話香港女仔唔怕（曝露年齡）。70歲嘅呂良偉就自認全場年紀最大，仲即場示範「呂式馬步」，教大家正確姿勢，身穿短裙嘅林志玲都有跟住做，但蹲低時不時用手掩住條裙，表情有啲尷尬。

蔡卓妍坦言唔習慣咁早做運動，因為凌晨5點就要做準備，前一晚瞓得輾轉反側，但精神都算唔錯。講到佢經常運動，跑步應該難唔到佢？佢笑話勤力同有冇難度係兩回事，自嘲冇大志，今次志在參與，唔係為攞冠軍。

熱衷打網球嘅蔡卓妍透露早前同關智斌打網球，大讚佢有天份，學咗冇耐就打得好叻，自己學咗一段時間都只係險勝，但佢話自己唔係想做運動員，好玩就得。講到男友林俊賢都好鍾意運動，佢笑指男友太勁太犀利，係另一個層次，問到想唔想追到男友嘅層次？佢笑話：「唔使啦，我太慢，佢除咗工作之外都係鍛鍊，唔好耽誤佢時間，我哋各有各跑，見到就見，總會見到。」

TWINS早前落區派奶茶，因粉絲太熱情險惹混亂，蔡卓妍更攬實驚青嘅鍾欣潼，蔡卓妍表示冇混亂，當日粉絲都聞風而至，「都係我哋嘅粉絲，想張大合照影得靚啲，先叫大家唔好逼。」

另外，「25+ 英皇群星演唱會」將於5月舉行兩場，有指粉絲買咗門票後，先知演出歌手未必兩場都出席，好似抽盲盒咁，有粉絲擔心未能見到鍾意嘅偶像。蔡卓妍對此表示自己係small potato，呢啲事要問公司，佢唔能夠代表公司回應，話霍汶希喺場可以問佢，但霍汶希隨後表示唔接受訪問。問蔡卓妍怕唔怕粉絲唔開心？佢話：「我只能講我嘅粉絲好開心。（事前有話畀佢哋知TWINS係演出邊一場？）唔係，總之我嘅粉絲唔會唔開心，其他粉絲就唔歸我管。TWINS喺今次演唱會會有特別crossover，會有一啲以前好少試嘅內容。（幾時開side track演唱會？）諗咗好耐，但我把聲仲未好，等好啲時再計劃。」

此外，蔡卓妍主演嘅電影《再見UFO》票房告急？佢表示已經好落力向親友推介，話自己喺南區大，都有親戚住喺華富邨，佢哋有計劃搞社區包場，又話男友仲未捧場，笑佢等家庭包場一齊睇，相信佢會鍾意。