林志玲寄語趁後生打好基礎 黃曉明推拍電影再戰博士班

林志玲、黃曉明今早現身馬拉松活動。「台灣第一名模」林志玲表示喺灣仔海濱跑步時，勾起唔少做新人模特兒嘅回憶，指當年喺會展出席時裝周，又話做咗媽媽之後，心態同生活上都有好多轉變，成日分享同小朋友嘅日常生活，提醒媽媽們唔好忘記保養，自言做家務時都會爭取時間敷面膜。

問佢有冇堅持長期運動？佢表示鍾意游水、跑步同跳彈床，可以訓練肺活量，又會透過瑜伽冥想靜心，並寄語年輕女仔要獨立思考、經濟獨立，趁後生打好基礎，有家庭觀同世界觀，話搵到自信，人生就會美好。佢感恩自己喺華語電影黃金期，拍攝咗吳宇森嘅《赤壁》而見識咗業界頂尖團隊，亦令觀眾認識佢，「我要不斷進步，唔可以辜負佢哋。」

黃曉明指跑馬拉松就好似人生一樣，有些人跑唔郁都要跑，有些人跑到一半想休息再跑，唔一定要跑到最後先係贏家；佢形容現階段係人生中最放鬆嘅時候，「自己舒服同開心，就係人生贏家。」問佢有冇運動拍檔？佢透露有時會約黃子韜、王鶴棣一齊，笑話有健身嘅黃子韜肥咗，要加把勁減重。

黃曉明舊年報考博士班，最後未被錄取，佢笑言唔感可惜，話今年再戰，笑指希望成為家中第一個博士。佢透露今年冇接戲，皆因仲未遇到喜歡嘅角色同劇本，「廿幾歲時唔會咁樣，總覺得要搵啲事去做，依家唔會喇，唔同年紀，心態上都會唔同。」