林志玲黃曉明黃宗澤現身馬拉松活動

「台灣第一名模」林志玲同內地男星黃曉明今日（26日）現身灣仔出席馬拉松活動，林志玲以一身白色運動套裝元氣滿滿亮相，一開場就用廣東話同大家打招呼：「好耐無見，大家好嗎？」佢話跑步期間欣賞到沿途風景，覺得好有活力又開心，仲憶起當年做新人模特兒嗰陣，成日喺會展出席時裝周活動，係對香港最深刻嘅美好回憶。

林志玲透露平日會做有氧運動，幫自己紓解唔開心嘅情緒。身為媽媽嘅佢被問到日常生活，話自己雖然忙住做家務同湊仔，但都會趁機敷面膜保養，提醒做媽媽嘅女性要識得照顧自己，又話成為媽媽之後體會到母親嘅愛同付出係無限同超乎想像。佢仲分享自己好鍾意游水、瑜伽、跑步同彈床等有氧運動，可以訓練肺活量之餘令心境平靜，透過流汗排出煩惱。

講到佢嘅演員之路趕上咗華語電影嘅黃金年代，林志玲話好感激當年《赤壁》令大家認識佢，又指喺黃金年代對自己最大嘅影響，係認識咗業內好優秀同頂級嘅團隊，令自己更加謙虛同希望不斷進步，唔好辜負佢哋嘅期望。被問到有咩說話鼓勵女性，佢話：「我希望每個女仔都可以相信自己，我覺得女仔無論係思想獨立、經濟獨立，都相當重要，呢樣嘢會幫你一輩子，從中找到自己嘅自信，內核亦會更穩定更強大，咁樣嘅人生會更快樂。」

同場嘅黃曉明形容馬拉松就好似人生一樣：「爬唔上去你都係要爬，可以唞一陣，但都有可能喺山腳就唔再上去，嗰都係一種活法，所以每個人嘅選擇唔一樣，唔係一定要跑到最後先係贏家。」佢又話近年最大嘅改變係學識放鬆，隨心而活創造屬於自己嘅開心人生，仲分享平日會同圈中好友好似王鶴棣、黃子韜等一齊健身運動。

提到佢舊年報考上海戲劇學院博士研究生學位，黃曉明話保持學習嘅重點係喜愛，坦言廿幾歲嗰陣成日想搵嘢做，唔想休息，但隨住年紀增長心態改變，透露今年冇接劇，因為覺得如果冇好嘅角色就寧願休息，亦會隨心選擇想做嘅事，好似學習一樣。對於遺憾落榜一事，佢就話：「舊年好可惜考唔到，但我覺得冇咩大不了，我就係希望自己有一日能成功，因為我屋企冇博士，我想做屋企第一個博士，如此而已。」

另一邊廂，視帝黃宗澤、鄧萃雯同陳松伶等今日都現身同一活動，當中Bosco參與咗5公里賽事，佢受訪時話朝早7點起身，令向來習慣夜瞓嘅佢笑言早起仲難過跑步，又話自己平時都係喺室內跑，今次係第一次挑戰馬拉松，體驗過後幾開心，好天氣下沿着海邊跑好舒服，過程好輕鬆好享受。

問到之後會唔會挑戰半馬等長途賽事，Bosco就話：「我諗逐步逐步嚟，慢慢增加多個興趣。（加入同發哥跑步？）唔敢高攀。（要交學費？）交唔交學費唔緊要，最大問題係太早起，佢哋話八點已經要起步，咁咪即係六七點起身，即刻退一退先，同埋我習慣夜瞓，平時三點先瞓。」早前佢喺社交平台晒出痛苦嘅健身相，Bosco話當時教練同佢鬆筋，一腳踩上佢大髀，令佢即刻痛到面容扭曲，形容好似「被坦克車輾過」，更忍唔住好似玩摔角咁大叫投降，所以影出嚟嘅相佢痛到控制唔到表情，網民嘅創意P圖都令佢覺得好搞笑同有趣。

提及Bosco早前投資嘅馬來西亞電影，佢透露一共投資咗7位數金額，電影已經拍攝完畢，目前正處理後期，預計七八月上映，自己都有用多年演戲經驗俾意見。問到有冇信心回本，Bosco話：「OK嘅，因為叫做嘗試吓，即係依家都係學習階段，你知依家演藝圈叫做比較平淡，咁係馬來西亞試吓先，如果真係略有所成，都希望可以出一分力。（全部你一個人出？）唔係唔係，仲有好幾個。（遲啲投資俾自己作品？）我覺得唔會，因為自己投資自己拍，我覺得個身份好尷尬。」

談到之後嘅工作，Bosco透露近日忙於飛去各地出席唔同活動，拍劇方面目前有四五個劇本，但因為劇本之間嘅拍攝期撞咗，所以希望從中揀出比較適合自己嘅劇本同角色。問到佢有冇加價，佢就笑言：「冇加價仲減價添大佬，俾面啦搵食啫。（減價？）即係咁講，可以嘅減價添㗎我，搵食啫。」TVB