《臥底嬌娃》關曜儁犧牲場面催淚 結尾一句話搞喊網民

熱播中嘅《臥底嬌娃》，今晚（26日）一集朱皮（關曜儁飾）犧牲自己保護奕風（馬貫東飾）一幕催淚指數爆燈！劇情講到世豪（杜燕歌飾）對奕風嘅背叛大為不滿，更設陷阱對付佢，朱皮得知後趕去營救。

當朱皮營救奕風時遇上世豪，對方見佢私下營救奕風非常憤怒，即場對佢拳打腳踢，打到朱皮頭破血流，傷勢嚴重。世豪聽到警車聲想逃走之際，朱皮用僅餘嘅力氣捉住對方隻腳，唔俾佢離開，仲話「風哥先係我大佬」，世豪再不斷毆打佢，朱皮都唔肯放手，最終被打到暈低。

妙姿趕到現場後，即叫朱皮要「頂住」，隨即以黑白色畫面播出昔日朱皮同妙姿相識嘅片段，以及佢同奕風嘅兄弟情回憶，最後朱皮講出「我之前冇得揀，我依家想揀做個好人」作結，場面感人。

大批觀眾睇完之後都話呢集非常催淚，又話對朱皮嘅犧牲感到不捨，紛紛留言「點解朱皮要死呀？好慘呀！」、「朱皮真係當奕風係大佬」、「睇到我喊晒，呢集好感動」、「朱皮你係好人嚟㗎！」

關曜儁接受訪問時自言拍攝呢場戲時十分緊張，「因為杜燕歌真係攞支真嘢打落嚟，雖然打唔中，但我都會驚，所以我全程閉眼係因為我好驚畀人打到。」佢又話拖走阿東離開時發生趣事，「因為講我要被阿瀅偷聽，所以我個電話放咗喺衫袋，點知拖拖下個電話跌中阿東個頭，都幾搞笑。」

劇中佢同馬貫東同陳瀅最多對手戲，關曜儁感激兩位拍檔嘅信任，不斷鼓勵佢嘗試，令到出嚟效果更好，「同阿東合作好正，佢好快就會知道你想做嘅嘢，大家好多時喺冇夾過嘅情況下，做到give and take個感覺，大家好信任對方，正正因為有呢份信任，先會出到咁嘅火花，感覺好奇妙。」佢續說：「我同阿瀅都係會傾，睇吓咩角度會令到整體感覺更好，我哋會夾好多唔同嘢挑戰導演底線，佢同樣係好信任我，叫我放膽去試，所以我好感激有呢兩位拍檔幫助我，令我嘅角色更加出。」TVB