《臥底嬌娃》邵美琪愧疚爆喊 同鍾柔美逾4分鐘母女戲勁動容**

熱播中嘅《臥底嬌娃》，今晚（26日）一集邵美琪同鍾柔美嘅母女情場口同樣成為大家焦點之一。

劇情講到邦妮（邵美琪飾）趕到酒店勇救女兒寶儀（鍾柔美飾），幸好寶儀平安無事。寶儀趁機講出心底話，「媽咪，我知你好錫我，但我唔想你再用呢個方法，我細個嘅時候俾男同學蝦，第二日個男同學就斷咗隻腳。之後我話俾間舖頭呃錢，第二日間舖頭俾人放火，我估到係你同daddy做」。

邦妮表示「我唔想你俾人哋蝦」，寶儀邊流淚邊話：「我知，所以之後我都唔敢接近其他人，唯有Mabel留喺我身邊保護我，但佢俾Robert害死，佢幫你做嘢」。寶儀再問邦妮：「佢哋帶啲女仔上去，用毒品控制佢哋，啲毒品係咪你同daddy？」邦妮諗唔到愈想保護女兒，反而令寶儀唔開心，更難掩愧疚之情，痛哭流淚。

當寶儀再指知道係佢對父親劉彪（關禮傑飾）落手兼知道佢係幕後黑手時，邦妮激動流淚「你唔應該知道呢啲嘢」、「對唔住我冇得揀」。最後寶儀勸佢自首，「無論點樣我永遠都係你個女，我會喺你身邊陪住你」邦妮被女兒嘅一番話勸服，決定自首，面對自己做錯嘅事。

呢場逾4分鐘兩母女嘅對手戲，邵美琪出色嘅演技，充滿層次情感嘅眼神，將內疚、傷痛、難以面對女兒嘅心情完美演繹，盡顯紮實嘅演技，再次令人讚賞不已。至於今場對演技初哥嘅鍾柔美甚有難度，皆因佢要慢慢引導「母親」邵美琪面對自己做錯嘅事，又要講出自己嘅心底話，惟佢嘅表現同樣不俗，唔少網民都話呢場母女戲令人動容。TVB