呂良偉自爆拍西片全英語對白 被周潤發追問係咪食咗防腐劑

呂良偉、黃曉明、蔡卓妍、鄧萃雯、林志玲等今早出席馬拉松活動，喺台上暢談運動嘅好處。呂良偉除低外套大騷麒麟臂，受訪時同現場傳媒分享養生心得。

呂良偉指自己70歲仍然熱愛工作，寄語後生仔唔好躺平。佢透露剛拍完一部荷里活電影，係首次拍攝西片，仲要係全英語對答，「套戲喺香港拍，係一部瘋狂喜劇，係我未演過嘅角色。我演一個中年花花公子，周圍追女仔，追求兩位90後嘅外國女仔，太太冇監場啦！未知套戲幾時上，導演安排去康城參展，我到時都可能去康城。」

呂良偉被稱為「凍齡男神」，佢話：「稱呼係大家畀嘅。」笑指周潤發都問佢係咪食咗防腐劑，佢就十分欣賞發哥保養之道，仲有耐性陪住盧海鵬、鄭則仕跑步強身健體，「令佢哋身體變好，盧海鵬唔使再坐輪椅。」