《自然系女子旅行3》葉靖儀自備十套泳衣逐集晒 黃瀅仴比堅尼初解放.TVB Plus（82台）王牌旅遊節目《自然系女子旅行》系列正開拍第三季，今次以山海為主題，為觀眾帶嚟療癒之旅。四位主持人當中，林映暉同梁超怡已經率先出發去到韓國濟州取景，仲流出了佢哋嘅泳裝照。

另外兩位主持人選亦已揭曉，分別係剛入圍《魔音女團》嘅葉靖儀，同埋《直播靈接觸》嘅小編「白無常」黃瀅仴，佢哋已經出發去花蓮同台東，預備咗多套泳衣磨拳擦掌準備享受當地溫泉。

葉靖儀接受訪問時難掩興奮心情，直言對當地美食好似蛋餅、牛肉麵、滷肉飯等台式美食情有獨鍾，更加鍾意當地溫泉，為此已經帶定十套泳衣出鏡。佢話：「今次第一次去花蓮，當地溫泉最期待，所以帶咗成十套泳衣過去慢慢襯。有唔同style、型格feel、可愛feel樣樣都有，可以襯唔同溫泉，啱邊套着邊套。」

至於黃瀅仴就話今次係第一次拍攝旅遊節目擔任主持，圓咗自己一個小心願同小目標，佢笑說：「工作以外本身都好鍾意旅行同食嘢，今次仲拍到好拍檔Michelle。」黃瀅仴話今趟花蓮、台東之旅會走訪唔少溫泉，安排咗好多泳裝環節，佢笑住話：「所以準備咗一系列比堅尼出鏡，平時去沙灘玩都有着得比較密實，一來怕醜、二來怕曬黑。」佢笑言第一次咁性感出鏡，所以比較緊張，希望唔會太多NG影響拍攝進度。TVB