保錡再為「阿叻合照」風波道歉 直認受教訓：自以為好笑其實onX.ERROR成員吳保錡因去年大年初一喺社交平台分享同陳百祥（阿叻）嘅合照，意外引起軒然大波。事件唔止引嚟負評，更導致大批粉絲脫粉，影響佢個人工作量同組合整體發展。雖然佢事後已經即時刪除貼文並致歉，但事件持續發酵，至今仍係唔少人嘅話題。

事隔一年，保錡再次喺社交平台發文道歉，坦承自己犯錯並感謝大家嘅教訓，表示：「我知道我做錯嘅地方，也接受大家嘅教訓，錯就認，打就企定。感謝大家一直教訓我畀意見我。我知道冇乜嘢可以補救，只能再同大家道歉。受到好大教訓，對唔住，但我都會堅持努力。」佢明白事件已難以挽回，但希望以誠懇態度面對外界批評。

不過網民反應依然兩極，有人認為保錡過往都做錯唔少，但每次都道歉、承諾改過，之後又犯錯，難以令人信服。有網民直接留言問：「其實點解大家都不喜歡你？」保錡坦率回應，話自己當時以為同阿叻影相係件「好笑」嘅事：「同叻哥影相，以為自己好好笑，其實係onX。」喺網民嘅批評下，佢近乎逐個留言認錯同回覆：「我明白！對唔住！」、「對唔住，我知我錯嘅地方！」、「對唔住，反省咗好耐！會尊重對方，感謝教導。」、「對唔住，唔會再亂影相，對唔住。」、「好誠懇嘅，對唔住，感謝你。」

有人叫佢應積極向ERROR隊友何啟華（阿Dee）同梁業（肥仔）學習，佢亦認同：「會努力跟他們學習，是很好的。」展現出積極改過嘅態度。另外，佢言語間似乎透露有情緒困擾，昔日佢成日喺threads留言「笑一個」，如今佢自言「微笑抑鬱了」；其實日前佢亦出過一個寫住「抑鬱」嘅帖文，其後刪去，而最新嘅帖文中當有人問：「其實你精神有問題定係當觀眾係玩具？」佢回應：「我有精神問題，也有去睇醫生，現在好很好，感謝你。」