【On.cc】江嘉敏晒泳照被抨擊　親自解畫：佢以為我冇着褲

藝人江嘉敏與黃美棋今日（28日）現身尖沙咀，出席一個時尚女性選舉活動。她曾於2024年獲獎，表示今日會趁機會分享獲獎後工作及行善經歷：「呢個獎都好講求社會責任，過去10年（無綫年代）時間上我難掌握，近呢兩年比較彈性，可以做多啲義工。（最難忘啲乜？）家訪，同小朋友玩完半日，佢真係會攬住我對腳叫姐姐唔好走，呢樣亦都係我最唔想面對嘅。」

她又揚言希望可以加入出國探訪團隊：「暫時都仲未有機會，依家多咗同唔同嘅機構合作，佢哋每年都有相關嘅活動，只係名額有限要抽籤。（有戰火危險都想去？）我身邊有好多醫生朋友，佢哋呢邊做緊手術，旁邊有人打緊仗都係咁。佢哋醫災民嘅身體，我應該可以參與心靈治療。」

談到工作安排，她透露目前開始學唱歌：「老師問我有冇諗過出歌，我話咁真係要練習吓先。以前如果登台，真係臨急抱佛腳，一個月前先開始上堂，依家一星期兩堂，想挑戰吓自己，都真係想出歌嘅，我要等自己唱得好啲先。（唔算魔音？）見仁見智啦。」

至於早前她於網上上載泳裝照，結果遭網民留言抨擊，她解釋說：「我有留言回覆佢，覺得有啲嘢要及時澄清，佢好似以為我冇着褲，但係嗰個國家（泰國）咁樣係犯法，我冇做啲犯法嘢。（覺得無奈？）搞笑多啲囉。」問到感情生活是否有着落，她即故作神秘：「順其自然啦，有好消息再諗分唔分享。首先要搵到合適嘅伴侶，先諗吓會唔會喺適當嘅時候，做適當嘅事情（公布拍拖）。」

江嘉敏被以為冇着褲。

江嘉敏作出澄清。

大送心心！

江嘉敏與黃美棋現身。

黃美棋都有送心心。