F4朱孝天現身演技綜藝做學員同後輩競技 曾志偉驚呼：點解要嚟

現年47歲嘅前F4成員朱孝天近日現身內地演技綜藝節目《無限超越班4》，以「學員」身份同一班後輩同台較量。朱孝天喺預告片中態度決絕，主動撕走外界貼上嘅「賣情懷F4」、「西門濾鏡」等標籤，強調以完全歸零嘅狀態重新出發。

朱孝天嘅加盟令評審團大感意外，導師曾志偉喺開播前見到名單嘅時候，忍唔住驚呼：「我好有興趣想知道，朱孝天點解要嚟！我一見到佢個名，嚇我一跳。」另一導師吳鎮宇亦係一臉疑惑，直接問：「佢點解嚟？」兩位前輩嘅反應隨即成為網民熱話，質疑朱孝天呢步棋究竟係為咗洗底定係純粹「蹭熱度」。

事實上朱孝天對表演一直有追求，佢早年以演員身份出道，2014年以35歲之齡考入北京電影學院導演系進修，係名副其實嘅「科班出身」。除咗《流星花園》嘅西門一角，佢最為人熟悉嘅仲有《楚留香傳奇》。