《正義女神》記者會專訪 佘詩曼×文頌嫻×許惠菁
由視后佘詩曼（阿佘）、譚耀文、陳煒、周嘉洛、戴祖儀、文頌嫻、馬貫東、劉倬昕等主演的無綫劇集《正義女神》，將於3月30日晚翡翠台首播。3月29日，一眾主演齊集荃灣出席「正義審判 稱霸開庭」主題記者會，已故藝人許紹雄的女兒許惠菁亦以嘉賓身份現身。活動現場吸引數百名市民及粉絲圍觀，場面墟冚；阿佘的粉絲更帶來卡通法官造型巨型氣球、Q版法官人形紙板應援，相當搶鏡。劇中飾演法官的阿佘以開庭模式登場，即引來全場尖叫，她現場公布該劇於內地平台已錄得超過2億播放量，其後更親自介紹好姊妹文頌嫻、許惠菁出場，甫見面就與許惠菁熱情相擁。活動過後，阿佘、文頌嫻、許惠菁三人一同接受傳媒訪問，分享拍攝點滴與幕後故事。
---
訪問實錄記者：阿佘今次係第一次喺劇入面飾演法官，拍落有咩感受？佘詩曼：今次真係演完法官先至發覺，原來呢個職業真係幾孤獨。因為佢要單獨行事，又唔可以同人隨便討論案情，我睇劇本嗰陣時仲未有咁強烈嘅感覺，但係真係著起件法官袍、行上法官席坐低嗰陣，呢種孤獨感同莊嚴感即刻湧晒上嚟。以前我平時開工，都會同其他演員傾下偈、講下笑，但係拍呢套劇嗰兩三個月入面，我完全唔想講笑，成日都要保持好嚴肅嘅狀態。就連去探文頌嫻班，帶咗曲奇餅過去，都唔夠膽同佢講笑，驚破壞咗佢投入角色嘅氛圍，拍攝期間明明好想同佢傾偈，都一直忍住唔敢打擾。
記者：聽聞今次係阿佘親自出馬，先打動到文頌嫻出山拍劇？文頌嫻：嘩！你唔好提啦！佢當時好嚴肅咁同我講，話我呢個角色對成套劇好重要，俾嘅壓力唔止要我做足100分，仲要做到120分！仲話我呢個角色要打頭陣出場，真係行先死先啊！（全場笑）
記者：咁久未拍劇，今次復出拍攝過程順唔順利？文頌嫻：講你都唔信，我第一日拍法庭戲嘅時候，竟然腳震啊！因為個場景整得太真實，一入去就感受到嗰種強烈嘅莊嚴感，連阿佘都問我驚唔驚，我話唔驚，點知佢話「我好驚啊」，我仲話佢「你梗係驚啦，你第一日嘛」，佢仲話「唔係啊，我都拍咗好多日啦」，就知個氛圍有幾入戲。而且今次呢個角色真係好有挑戰性，我要飾演一位經歷喪子之痛嘅媽媽，呢種悲痛對於一個媽媽嚟講，真係好難去演繹，感受好深。仲要拍攝期剛好夾住聖誕節同農曆新年，本來係好開心嘅日子，我事前仲專登同總監製鍾澍佳講，問可唔可以唔好拖到新年，驚自己嘅情緒帶過年，結果最後一場戲，仲係拍到年三十晚。拍攝嗰段時間，我真係唔敢笑、唔敢放開食、唔敢太開心，就連我13歲嘅女兒都問我「媽咪你發生咩事啊」。為咗投入呢個角色，我有時仲要幻想自己個女離開咗我，每次諗起都好內疚，所以每次收工，我都會翻去睇下個女嘅片，先至可以抽離返個角色出嚟。雖然我嘅戲份短短得兩集，但係其實由頭帶到尾，差不多到最尾幾日先殺青，個情緒真係要維持好耐，壓力真係好大。始終以前年輕嘅時候，一日拍十幾場喊戲都冇問題，而家年紀大咗，眼淚唔係話出就出，真係需要好多時間去醞釀咁深層次嘅情緒。我記得有一次記者嚟探班，剛好我拍嗰兩場最大戲肉嘅喊戲，我一停机就喊到講唔到嘢，連工作人員都唔忍心遞紙巾畀我，當時真係連招呼都照顧唔切，真係唔好意思。
記者：咁拍完呢部劇，仲有冇戲癮，會唔會繼續拍劇？文頌嫻：梗係有戲癮啦！不過下次可唔可以開部笑片啊！（全場笑）其實我不嬲都鍾意拍戲，有好嘅角色都想試，但係都要睇劇本，始終都驚自己做唔到。
記者：兩個好姊妹合作，覺得對方今次表現點樣？文頌嫻：阿佘背劇本真係好叻，啲劇本、啲戲份熟到不得了，功力超勁！不過佢打麻雀就完全另一回事，計數完全唔識嘅！佢好好運，成日贏錢，打嘅時候好唔認真，但係食糊就超認真！淨係識食糊，攤牌出嚟計番幾多番都唔識，淨係知自己贏最多錢。你話Edan（呂爵安）、吳君如佢哋同阿佘打麻雀輸錢，簡直係入咗騙局啊！我仲笑住話要問吳君如使唔使裝閉路電視重組案情添！之前何啟華仲提議我唔使帶錢去打牌，我仲笑住話「輸錢可以PayMe㗎嘛！」佘詩曼：（笑）如果將來有機會合作，我一定帶住你㗎啦！
記者：阿佘之前北上出席活動，有片流出話你險被粉絲扯跌，當時情況究竟係點樣？佘詩曼：其實冇網上講得咁誇張，只係影出嚟嘅角度問題，睇落好似好驚險。當時有幾個粉絲係想同我握手，所以掹住咗我隻手，完全冇失控，現場嘅保安管理得好好，保護得好足，我完全冇擔心過安全問題。其實我入行20幾年，見過更瘋狂嘅場面，以前登台嘅時候，仲試過有人直接衝上台，依家嘅環境已經好安全好多。
記者：有網民話《正義女神》同韓劇《少年法庭》劇情相似，你點睇呢個講法？佘詩曼：其實少年罪犯呢個議題，每個國家都會遇到，唔係邊一套劇獨有嘅。我哋都希望透過呢套劇，去引導青少年，等大家知道，喺恰當懲罰之外，都可以俾犯錯嘅年輕人一個改過自新嘅機會。
記者：今次呢套劇都係許紹雄（Benz雄）哥嘅遺作，惠菁睇完爸爸嘅演出，有咩感受？許惠菁：其實睇呢套劇嘅時候，我真係好感觸、好感動。今次爸爸呢個角色，同佢過去十年大家見慣嘅搞笑角色有好大分別，呢個角色既慈祥、容易心軟，同時又好嚴肅，佢會覺得可以輕判就盡量輕判，但係同時又會守住法律底線。其實現實入面嘅爹哋，就同呢個角色一樣咁慈祥，我咁大個女，佢從來都冇鬧過我，就算有咩問題，都會好理性、好和平咁坐低同我傾，所以睇到呢個角色，就好似見到真實嘅佢一樣。呢套劇對我嚟講，意義唔止係見到爸爸一個新嘅角色，更加因為呢個係佢最後一齣劇集，係佢嘅遺作。見到佢同家姐（佘詩曼）拍得咁開心，我真係好開心，呢套劇可以成為佢嘅遺作，我覺得好幸運、好感恩。
記者：會唔會想將來有機會同阿佘一齊拍劇？許惠菁：哈哈，我諗起都覺得好大壓力啊！其實之前冇乜諗過呢個方向，不過如果有機會當然唔會抗拒。只係同家姐一齊拍戲，壓力真係好大，除非佢唔做法官啦（笑）。就算係搞笑戲都好，家姐拍戲永遠都做足功課，無論咩角色都會準備得好充足，所以同佢合作一定有壓力，不過我相信如果真係有機會，家姐一定會帶住我嘅。
記者：之前有傳聞話你同圈外丈夫婚變，可唔可以回應下？許惠菁：我而家都係工作至上，今日嘅焦點係《正義女神》呢套劇，其他嘅嘢就唔多講啦。
記者：阿佘今次呢套劇內地已經有超過2億播放量，對香港首播有冇信心？佘詩曼：咁當然希望成績可以再好啲啦，好多謝內地觀眾嘅支持，先可以有咁好嘅成績。聽日晚八點半《正義女神》就會喺翡翠台首播，希望大家記得準時鎖定，尤其係我好姊妹文頌嫻打頭陣嘅戲份，大家一定要睇，千祈唔好走寶！
TVB
