胡蓓蔚單立文慶祝結婚18周年原來仍未註冊 「侯賽因」驚喜現身.「豹嫂」胡蓓蔚同「豹哥」單立文係圈中模範夫妻，結婚至今感情依然甜蜜如初，令人羨慕。繼上兩個星期單立文67歲生日，胡蓓蔚驚喜現身電視城同《愛·回家之開心速遞》劇組為老公慶生之後，前日（28日）適逢兩人結婚18周年紀念，胡蓓蔚再度喺社交平台放閃，仲貫徹兩公婆一向嘅搞笑作風，令「侯賽因」驚喜重現螢幕。

相中見到胡蓓蔚紮起高馬尾兼繫上蝴蝶結，著住黑色掛頸背心，雙手托腮坐喺路邊嘅鐵閘前。面對鏡頭時，佢露出甜蜜神情，宛如熱戀中嘅少女。之後，胡蓓蔚更主動伸手，同身旁着住米色花紋恤衫嘅單立文十指緊扣，場面溫馨。

正當大家以為單立文會型仔咁出現喺鏡頭前時，畫面卻令人意想不到！單立文用平板電腦擋住個頭，屏幕中顯示嘅係佢昔日經典角色「侯賽因」嘅靚仔造型劇照。胡蓓蔚對住「侯賽因」做出嘟嘴作勢錫錫嘅動作，最後自己都忍唔住爆笑出聲，畫面非常搞笑。

胡蓓蔚寫道：「今日係結婚18周年，我冇乜點變，反而佢就老咗⋯⋯ 🥰❤️ 2008328 人不marry枉少年 其實靚仔真係好靚仔㗎 18年真係眨吓眼就過」。雖然睇落好似嫌棄老公變老，但字裏行間流露出滿滿嘅愛意。貼文引來唔少圈中好友留言，胡杏兒、姚子羚、李施嬅同古佩玲等都大讚兩人Sweet；網民亦留言話胡蓓蔚「被寵得像少女」，祝福兩人「繼續深愛，繼續幸福」。此外，「侯賽因」嘅出現當然亦勾起大家集體回憶，唔少人套用其經典對白開玩笑：「想偷我雞，第一句諗起呢句」、「開嚟見我」，令人哭笑不得。

胡蓓蔚同單立文當年婚宴上星光熠熠，但佢哋當時話暫時未註冊。而兩人早前接受資深傳媒人車淑梅嘅電台訪問，被問到幾時註冊時，單立文坦言：「實不相瞞，我哋仲未註冊。」又話湯盈盈比佢哋更心急，特登拎咗張婚姻註冊申請表，吩咐佢哋快啲填好。

胡蓓蔚就話，因為當年擺酒時，有好多朋友未有參與或未認識，例如「胡說八道會」只有胡定欣一人做佢嘅姊妹團，所以佢一直希望喺兩人結婚20周年搞個小型派對，請一啲佢哋生命中重要嘅朋友一齊慶祝。