丁子朗「一男戰四女」像被選中嘅幸運兒：真係有韋小寶嘅感覺.藝人丁子朗同陳山聰日前（28日）喺內地一個商場出席短劇《青霧》首映兼見面會，當日現場人頭湧湧，唔少市民都同兩位嚟個近距離接觸。首度挑戰短劇市場嘅兩位，接受訪問時直言新鮮感十足。雖然《青霧》已經話題性強，但另一部劇《天選之子的煩惱》反應仲更加大。一向勇於挑戰嘅丁子朗，今次首度涉足短劇賽道，竟然話喺劇中享受「韋小寶」級數嘅待遇，周旋喺四位美女之間，連佢自己都忍唔住話：「好幸運！」

丁子朗喺訪問中透露，另一部叫《天選之子的煩惱》嘅短劇，特別之處在於佢係「男頻」視角，佢喺戲入面同四位女演員（包括：郭珮文、陳若思、林木婷子及尤佳）一齊，甚至有被四個女仔同時取悅嘅戲份。佢笑稱呢套劇係從男性視角出發，等觀眾了解女性世界，自己更加似係被選中嘅幸運兒：「我有少少嗰個韋小寶囉，真係有韋小寶嘅感覺！因為其中一個劇情好搞笑，佢哋四個女仔一齊嚟取悅我、討好我，我就覺得真係個編劇諗得好。」雖然被美女簇擁，但丁子朗爆料拍攝現場其實好嘈，甚至要導演叫大家安靜啲先可以專心工作：「導演都唔知幾次叫大家不如安靜啲，Focus拍嘢咁樣。」

講到作品表現，丁子朗興奮咁話呢套劇上線首日熱度已經衝破3000萬，令佢非常感恩。比起數據，佢更在意網民嘅即時互動：「因為每一集都有幾十個留言，甚至有啲誇張劇情嗰幾集，重點嗰幾集有百幾個留言。真係啲人真係鍾意劇情，所以我覺得短劇有一個趣味性就係好易互動。」

對於俾人標籤做「韋小寶」，丁子朗認為呢個只係一個趣味嘅切入點，最重要係能夠透過短劇呢種新興形式，同唔同地區好似大灣區甚至海外嘅觀眾建立連繫。緊接其後，佢亦會參與「中劇」《他心不難測》，睇嚟丁子朗已經準備好喺現代韋小寶嘅路線上，繼續開拓佢嘅短劇王國。TVB