譚耀文相隔22年回歸TVB 與佘詩曼再做夫妻：曾經有愛但共處一室.相隔將近22年，譚耀文再次出演TVB劇，兼且再次同佘詩曼合作。兩位「高人」再度聯手，真係叫人期待！譚耀文接受《香港01》訪問時透露，喺劇中飾演佘詩曼嘅前夫，劇情後段仲會同佢有更多對手戲：「其實唔難想像，曾經有愛但係共處一室。」

早年譚耀文專注拍電影，佢話近年先至萌生返嚟拍電視劇嘅念頭：「其實之前都有，一路都叫我返嚟，但係之前有啲古裝又覺得唔係咁啱。對上一次係《無名天使3D》，睇返啲片都覺得我同阿佘嗰時好細個。」

阿佘主演嘅《新聞女王》大收旺場，問到譚耀文對《正義女神》有冇信心，佢就話：「公平啲講，有陣時又唔係下下要鬥幾多點（收視）。」佢話除咗睇佘詩曼嘅演技，佢本人嘅回歸同劇中新演員嘅演出都係焦點之一，反而收視唔係唯一重要嘅事。

問到會唔會想憑《正義女神》攞獎，譚耀文就話：「唔諗獎㗎啦，最緊要令自己開心。我覺得呢啲時也命也，睇角色囉，最緊要隨緣，做得開心。（想攞視帝定影帝？）唔敢諗呢啲，因為愈諗，愈會令自己太大壓力。」TVB