羅毓儀將踏入30歲暗示想結婚 盼《臥底嬌娃》原班人馬開拍第二季.羅毓儀（Yuki）前晚以代言人身份拍攝美容廣告，透露今次酬金達六位數字，呢份亦是她參加《女神配對計劃》之後接落的工作。天生一副童顏的Yuki向來注重保養同養生，除咗恆常做運動之外，亦都有定期做美容護理，而今次代言的店舖老闆亦歡迎她帶朋友一齊試用服務，她就曾經帶男友林俊其（Kris）到店體驗。

講到由她有份主演的劇集《臥底嬌娃》日前播完大結局，Yuki直言十分不捨，仲爆料話日前約齊劇組班底一齊食飯睇大結局當晚，張曦雯因為不捨劇集完結當場爆喊，她同陳瀅就一齊上前安慰，而劇組一班演員就算拍完劇，私下都會經常約見面，感情相當要好。Yuki亦坦言好希望可以原班人馬開拍第二季，皆因今季結局入面，一班主角無再做警察，轉行做私家偵探，留有好大的劇情發揮空間。對於劇集播出後反應理想，Yuki就話拍攝過程大家都相處得好開心，有信心觀眾都可以投入到劇中的感情線，尤其係她同吳子冲組成的CP，相當受觀眾歡迎。

提到吳子冲早前宣布離巢，Yuki就直言深感可惜，指對方過往演過唔少角色，偏偏係憑《臥底嬌娃》人氣急升之後，剛好合約到期。不過她就相信吳子冲依然對演戲充滿熱誠，好期待第二季可以再同對方合作，仲透露吳子冲而家有做生意的計劃。除此之外，Yuki亦表示下個月會專程去澳門，支持陳瀅同蔡潔的演出。

向來走甜美可愛路線的Yuki，日前就喺社交平台晒出黑絲性感相，引來唔少網友熱議。她就坦言，今年即將踏入30歲，想自己的人生有所轉變，無論係事業、愛情定係家庭，都想有進一步的規劃。被問到會唔會想早日成為人妻，Yuki就表示感情事不能強求，自己亦都不會主動向男方求婚，她笑言：「我唔想令別人覺得自己好恨嫁。」Yuki仲自爆，拍攝廣告當日男友Kris都有現場監場，仲幫她篩走咗一批更加性感的相片。被問到為何不索性同男友以情侶檔接工作拍攝，Yuki就搞笑反問：「佢都着黑絲？」她仲透露，男友而家都搵咗攝影師幫自己打造全新形象，她自己都十分期待成品。TVB