林夏薇返廈門家鄉舉行音樂見面會 專為鄉親獻唱閩南語歌 帶病完成演出感動全場.林夏薇繼廣州站之後，琴日（28號）晚喺自己嘅家鄉廈門，舉行第二場「The Only」音樂見面會。喺廈門出世同長大嘅佢，對呢座城市感情深厚，當晚唔少親友同校友都專程到場支持。雖然佢早前因病一度失聲，但喺現場觀眾嘅熱情應援之下，最終都順利完成咗成場演出。

薇薇當晚以一身閃亮粉紅色造型登場，用一首輕快嘅《日不落》為見面會揭開序幕。現場仲播放咗佢喺廈門嘅童年舊照，同埋早前返中學母校探訪師生、與學弟學妹合唱《明天會更好》嘅片段，場面相當溫馨感人。大會更驚喜播出咗佢堂兄林峯預錄嘅打氣影片，令薇薇當場感動不已。

今次見面會，薇薇仲請嚟咗表演嘉賓馬志威——兩人之前喺劇集《黑色月光》入面飾演反派情侶，今次就拍住上合唱經典情歌《你最珍貴》。馬志威坦言，當初接到薇薇嘅邀請電話時即刻一口答應，點知掛咗線就馬上後悔，皆因自己從未試過公開演唱，為咗今次演出仲專誠搵咗唱歌老師特訓，驚自己失禮人前。佢仲大讚薇薇相當有勇氣，而薇薇就笑言，希望藉住今次機會幫馬志威「洗白」，強調現實入面佢係一位好演員，兩人之前合作都相當愉快。

為咗今次廈門站，薇薇仲專門準備咗兩首閩南語歌《海海人生》同《愛拚才會贏》，演出期間佢仲行落台同觀眾握手互動，全場氣氛高漲，相當熱烈。

事後薇薇接受傳媒訪問時表示：「返屋企嘅感覺真係非常溫暖，之前身體唔舒服，仲失聲講唔到嘢，當時好擔心會影響演出水準，但台下嘅家人朋友、學弟學妹都咁熱情，畀咗我好大嘅正能量，鼓勵我一路唱落去。」佢仲話，今次第一次唱閩南語歌，完全係為咗家鄉嘅觀眾準備，呢一站嘅意義同其他地方完全唔同，呢度充滿住自己成長嘅美好回憶，希望將來可以多啲返廈門同大家見面。TVB