方力申教女兒靠自己勿躺平 蔡俊彥理財有道勇闖樂壇.新手爸爸方力申（小方），與現時世界排名第一的香港劍擊運動員蔡俊彥（Ryan），近日一同出席銀行活動，分享各自對財富管理、人生規劃及未來發展的獨到見解。

由奧運游泳選手轉型為歌手、演員，再到創辦個人游泳學校成為企業家，方力申的人生經歷過多次重大轉變，最近更添上「爸爸」的新身份。小方坦言：「面對不同階段嘅機遇，每一次轉變都係一場學習，令我學識點樣堅持、調整心態同管理財務，呢啲都係用錢都買唔到嘅經驗。我仍然會不斷尋找新挑戰，好似由東京、巴黎奧運主持，到內地歌唱節目主持，再由內地開騷到最近嘅紅館個唱，呢條路行得好神奇。」

談到女兒Isla的將來，小方就表示希望女兒學識靠自己：「我自己向來使錢都有『三筆錢』概念：而家要用、將來要用、留畀仔女用。其實教小朋友，最緊要係讓佢知道要靠自己努力，醒醒定定讀好啲書。留畀佢嘅能力愈多，留畀佢嘅錢就可以少啲；如果淨係識留錢畀佢，將來佢嘅能力可能好低，就等於躺平。」

除此之外，小方仲分享，自己日常的體能訓練都會運用數據分析，亦會透過AI處理日常工作事務，幫助自己更準確掌握訓練強度同身體恢復狀況，從而調整節奏、安排訓練內容，讓自己可以持續進步。

而蔡俊彥就坦言，自20歲轉為全職運動員之後，就開始意識到理財規劃的重要性。向來秉持運動員謹慎態度的佢，從來不做高風險投資，只靠每月定額儲錢累積財富。小方聽完之後，即刻以一副外父口吻大讚：「呢啲仔，嫁得過！我個女就係要搵呢啲。」Ryan仲透露，爸爸係銀行從業員，一直會幫佢睇實理財狀況，令佢唔會亂做投資。

席間Ryan同主持分享，自己最近正式以歌手身份闖樂壇，呢個決定原來都係受小方啟發。佢話，去年為好友呂爵安的演唱會擔任嘉賓之後，就愛上了舞台。Ryan坦言：「當初如果我安守本份，就唔會成為一個全職運動員。既然7年前我做過一個咁任性嘅決定，7年後我想繼續跟隨自己嘅內心去走，所以選擇同時做運動員同歌手。」

佢仲透露，做歌的費用相當高昂，但慶幸自己近年運動成績理想，有可觀的獎金同更多商業活動邀請，等佢可以仔細計算好所有開支之後，先踏出闖樂壇呢一步。而身為過來人的小方，亦都鼓勵佢，唔需要在意外界的批評，專注自身進步、珍惜愛錫自己的人，最緊要係每次都有進步，所有人嘅眼睛都係雪亮的，一次比一次做得好，自然就能收穫更多支持。