無綫IP內地搶灘！丁子朗變陣「短」打 獨攬3劇發圍 楊梓瑤獲欽點做女一.近年內地微短劇市場熱度持續爆燈，已然成為影視圈最搶手的掘金熱土，不止大批香港藝人爭相北上插旗，就連TVB都正式官宣重磅入局，宣布與內地頭部短劇平台紅果短劇達成深度合作，更會將自家海量經典IP悉數改編成短劇，頭炮作品正是無綫殿堂級宮斗神劇《金枝慾孽》，消息一出即引發全網觀眾熱烈期待。
早前TVB正式發布公告，宣布公司名稱將由「電視廣播有限公司」正式更改為「無綫集團有限公司」，官方指明有關決定，是為了反映集團順應全球媒體市場發展趨勢、推進多平台及多元化業務布局的核心戰略。TVB行政主席許濤早前所透露，其實已有大量微短劇運營商主動上門洽談合作，集團一直計劃善用自身豐富的經典IP儲備開拓新賽道，而今年的重頭動作，就是與月活躍用戶破億的內地短劇平台「紅果短劇」合作推出多部定製作品。除了打頭陣的短劇版《金枝慾孽》，後續亦會有更多無綫經典IP的短劇改編項目，預計全部會在今年內陸續上線。據了解，短劇版《金枝慾孽》目前尚未官宣最終參演陣容，未敲定由無綫自家藝人還是內地短劇演員出演，而製作團隊、選材方向及角色設定，暫定均由內地合作方全權負責。
其實早於TVB官方正式入局之前，已有不少香港藝人率先試水短劇賽道，當中離巢的視帝王浩信、黃宗澤等，更是港星北上拍短劇的先頭部隊。而隨住TVB全面布局短劇市場，旗下一眾現役小生花旦亦紛紛解鎖新領域，在各大短劇平台站穩陣腳，包括陳山聰、丁子朗、林正峰、楊梓瑤、阮嘉敏、郭珮文、陳若思等，近期悉數有短劇新作推出，部分作品的宣傳力度，甚至比TVB自家播出的正劇更強。
講到近年內地短劇的爆紅趨勢，劇本大多由網絡小說改編，題材包羅萬有，由霸總甜寵、復仇爽劇到穿越題材一應俱全，亦成為了不少TVB藝人北上發展的捷徑——除了可以快速打開內地知名度之外，酬勞亦相當可觀，有消息指短劇拍攝的日薪最高可達五位數。不過當然有辣有唔辣，短劇主打「速食」製作模式，拍攝節奏極快，演員每日的休息時間往往只有2、3個鐘，賺的絕對是名副其實的辛苦錢。
當中近期勢頭最猛的，絕對要數丁子朗，近期一口氣有3部短劇作品陸續上線，成績全部相當亮眼。當中他與一眾新生代演員合作的橫屏短劇《他心不難測》，更殺入騰訊劇集榜第3位，熱度僅次於張凌赫主演的大熱劇集《逐玉》，絕對是「刀仔鋸大樹」的黑馬之作。
丁子朗接受本報獨家訪問時坦言：「冇錯呀！最近有3套劇推出，最主要係騰訊嗰套《他心不難測》，劇中幾個演員都係新生代，雖然同劇演員流量好高，但都算係刀仔鋸大樹之作。」提到近期主力在內地發展，他就笑住補充：「其實香港我都仲有存貨，都好希望可以快啲同香港觀眾見面。」至於外界熱議「短劇酬勞遠比拍TVB劇高」的話題，丁子朗就直言：「酬勞真係要問公司先知，我自己冇過問，因為依家比較想要嘅，係畀更多人見得到嘅機會。」
另外，丁子朗夥拍無綫「咪神」郭珮文、陳若思主演的甜寵短劇《天選之子的煩惱》，近日上架後瀏覽量已經突破3000萬，成績相當不俗。劇中丁子朗挑戰「一王四后」的霸總人設，更笑稱自己好似現代版韋小寶，艷福不淺：「郭珮文個角色比較成熟有女人味，陳若思個角色就夠霸氣，全程用拳腳說話，幾個角色反差好大，拍出嚟效果好得意。」呢套以男主角第一視角拍攝的「男朋友視角」短劇，主打觀眾沉浸式代入，被問到為何會被選中做男主角，丁子朗就笑住話：「我專登問過選角團隊，佢哋話正正因為我唔算太靚仔，觀眾先更容易代入，話我個樣少少和藹可親、冇攻擊性，哈哈！」而郭珮文亦有在社交平台分享該劇內地宣傳的現場照片，就算今次一改往日風格封胸出鏡，淨係曬出纖腰都依然相當搶鏡。
除此之外，丁子朗與陳山聰合作的都市情感短劇《青霧》亦即將上架，預告片中陳山聰的廚師形象同仙俠背景交織，營造出超強神秘感，未播先火引發網民熱議。呢次亦是陳山聰首次拍攝短劇就擔正男一，日前佢仲同丁子朗一齊現身高州，出席該劇的首映禮兼粉絲見面會，同大批粉絲近距離互動，現場場面相當熱鬧。
除了丁子朗、陳山聰之外，有「高妹港姐」之稱的楊梓瑤，亦憑住出眾的樣貌同身材，加上內地廣闊人脈，劇接劇成功打開內地市場，近日更在新拍攝的短劇《案例穿梭者》中升呢做女一，戲中仲獻出了自己從影以來的性感第一次，上演唯美「全裸」鏡頭，畫面背後卻原來是搞笑擔當。
現年22歲、2024年香港小姐季軍的楊梓瑤，擁有1米78的模特兒身高，憑住內地超強人脈，近年不停拍劇拍電影，工作量遠遠拋離同屆港姐倪樂琳同梁嘉瑩。日前楊梓瑤接受訪問時透露，近日接下了新短劇《案例穿梭者》，仲唔使面試就直接拿下女一角色，佢話除了因為媽媽的朋友的朋友推薦之外，都算是緣份際遇：「製片人睇咗我之前嘅作品，就直接定咗我。其實4年前佢已經見過我，嗰次試鏡我仲肥肥哋有Baby Fat，自小在荷蘭長大普通話都麻麻哋，最後試鏡失敗。今次佢睇咗我社交網呢幾年嘅變化，見我變靚咗，又去選咗港姐，所以就揀咗我。」
今次拍攝最令楊梓瑤開心的，是劇中飾演她「父親」一角的，正是她母校北京電影學院的教授，戲中她亦有多場情緒爆發的重頭戲，不過佢就話最鍾意的是浴缸沖涼的戲份：「因為導演拍得好靚，落足心機去拍，不過其實好好笑，拍出嚟嘅效果好似冇着衫，其實我打晒底好安全。（係咪你從影最大尺度？）係呀，我本身唔鍾意太性感，而且太性感嘅畫面內地都過唔到審。」
本身身材Fit到漏的楊梓瑤，之前去布吉島度假時，就拍過一輯超索的比堅尼相，佢笑謂唔介意着比堅尼示人，為了影出靚相，出發前仲特登花了兩個月時間操出人魚線，不過因為拍短劇日程太密，完全冇時間鍛煉，而家腹肌已經宣告失蹤。佢又透露，自己即將再入劇組，同之前合作過的導演再合作拍網大，好大機會可以再演女一，工作真係排山倒海。
天生身材高挑的楊梓瑤，之前亦有出演無綫節目《剪裁魔法師》，一嘗做模特兒的癮，佢希望未來可以模特兒同演戲雙線發展，仲自爆有歌手夢，希望將來有機會可以初試啼聲。佢自知自己廣東話麻麻哋，會努力向同屆的倪樂琳同梁嘉瑩請教，不過就苦笑話：「明明講好咗教我講廣東話，但講講吓又轉咗講普通話，根本練唔到。」另外佢又提到，知道自己個名同圈中其他藝人撞名，曾經考慮過改名，不過請教過堪輿學家之後就打消了念頭：「大師話依家先改名會太遲，作用唔大。」
TVB
