首先，要向太陽致以最高敬意，喺不公義之前，全場未有放棄，奮戰到底。

通常寫波時盡量客觀，理性咁分析比賽，但呢場真係好難唔嬲，好難明白球證諗緊乜。

全場唔止一次，出現對雷霆有利嘅判決，迪雲保加（Devin Booker）不斷被人推撞，視若無睹，進攻時轉身射波，就立即吹進攻犯規；以前打波，前輩教路，你貼到咁埋，入咗人圓柱體，好易食踭，而且仲係犯規，呢球DB根本無心打人，只係攞番個出手空間，挑戰完，都係進攻犯規。

卡魯素（Alex Caruso）同SGA不斷轆地，不斷獲得有利哨音。太陽全場打到綁手綁腳，點可以唔輸波？

咁都算啦，第三節尾段，DB飛身救波，個波打中積連威廉士（Jaylin Williams），球證即刻吹雞，OK，以為吹J-Will犯規，係就係犯規，但送多個T畀迪雲保加（Devin Booker），大家可以睇下片，連旁述都呆咗，整個網上世界無人知道發生咩事。

古有鄧肯微笑被逐，今有書生救波食T。

太陽未有放棄，加上雷霆嘅謝倫威廉士（Jalen Williams）傷出，SGA手指受傷，打到最後一分鐘，力盡被連入兩球三分，先輸107:120，以今場嘅執法準則，太陽可以只輸13分，真係好有鬥志。

朋友話，「Booker 呢球都進攻犯規？唔使打啦咁。CLS 慢鏡睇到個踭都無明顯向外打出去，都要維持原判，要幾厚顏無恥先做得出?」

我嘅回覆係，「所以雷霆咁乞人憎係有原因。」

大家點睇呢場波嘅執法水準？

文章擇自- 仙道彬手記🏀