《愛．回家之開心速遞》7月停拍 無綫密謀新劇接棒.無綫長壽處境劇《愛．回家之開心速遞》自2017年2月首播以來，陪住港人足足9年幾，截至昨日已播出2,805集，係香港電視史上最長壽嘅處境劇。不過，本報收到獨家消息，呢套「神劇」好快就要同觀眾講再見，暫定播到7月便正式落幕，為呢個里程碑畫上句號。

據知，日前《愛．回家》嘅幕後揸Fit人、無綫執行董事曾勵珍，聯同製作部助理總監文偉鴻突然急召一眾演員開會，正式宣布公司有意停拍。消息來得突然，演員們都大感不捨。畢竟劇集長拍長有，成為唔少台前幕後嘅「鐵飯碗」，尤其近排開劇數量唔多，好多演員已賦閒在家，停拍意味住生計受影響，難怪人心惶惶。

其實《愛．回家》由最初計劃180集，到而家播到近3,000集，可謂超額完成。但近年創作上開始遇到瓶頸，雖然收視一直高企，但故事題材屢被指「過火」、「抽水」甚至荒謬老土，劇迷紛紛表示棄劇。核心演員一個接一個離巢，熊家、龍家永遠唔齊人，後期加入嘅新角又唔夠吸引力，令「家」的感覺買少見少。經典CP好似「龔水戀」、「蓮輝戀」已難有突破，靈魂人物「金城安」周嘉洛都成功轉型唔再做廢青，故事實在難再寫落去。

加上處境劇動用5、60個連戲演員，台前幕後開支龐大，經濟效益下滑之下，無綫決定將劇集推倒重來，見好就收，為觀眾留下美好回憶。據知公司已密謀打造全新處境劇接棒，希望帶俾觀眾新鮮感。一班《愛．回家》演員雖然對會議內容「封口」避談，但都期望喺新劇有緣再聚。TVB