愛回家停拍｜呂慧儀不捨但明白有開始就有結局 張景淳：拍好最後直路.無綫長壽處境劇《愛．回家之開心速遞》傳出即將停拍，一眾演員接受東網訪問時紛紛表達不捨。飾演「熊若水」嘅呂慧儀坦言唔知幾時會停，但話：「如果要停就梗係會唔捨得，不過有開始就會有結局，都希望嚟緊有更精彩嘅處境劇睇，可以參與就更好。」佢透露拍完大結局後會唞一唞，回味一下呢幾年嘅努力，同時佢嘅教育中心一直有營運，有時間可能會再進修。

「熊樹根」劉丹就話呢兩日休息，睇新聞先知停拍消息，但強調「唔使驚」，因為TVB做事好穩陣，等聽日返工了解吓。至於「龔燁」張景淳就大感不捨，話自己2016年1月開鏡、同年10月加入，拍咗9年幾，「非常不捨的，但喺最後呢段直路，我會落力拍好佢。」佢話之後會聽公司安排，休息階段會增值自己同操fit body。

「江百慧」鄺潔楹話一定唔捨得，因為《愛回家》係佢第一套劇，由大學生做到入接龍集團，估唔到一做就8、9年，有好多美好回憶。佢聽聞公司會有新處境喜劇，希望大家可以再合作。「蔥頭」丘梓謙就話好開心做到「蔥頭」角色，令更多人認識佢，雖然唔屬於熊家或龍家，但都當咗劇組係屋企人，每次開工一齊食飯、萬歲下午茶，好開心。佢回顧自己拍咗5年，相信日後同「屋企人」可以喺第二套劇再遇。

「Bonnie」林凱恩就話能夠成為Bonnie係人生中最值得感恩同最快樂嘅事之一，呢個節目陪住佢走過青春、見證成長，期待更多可能。TVB