佘詩曼激罕性感現身 蘋果綠低胸裙騷事業線 獲粉絲提早慶生.視后佘詩曼今日（14日）以嘉賓身份出席首飾品牌活動，穿上蘋果綠色低胸吊帶裙，大騷深長事業線，弗爆身材引來在場大批粉絲歡呼。粉絲更手持應援物，預祝佢本月28日生日快樂。阿佘開心表示，近兩年生日都忙住拍《新聞女王》1、2集，難得今年有假期，可以逐一出席朋友邀約嘅生日飯，笑言成個月都排滿飯局：「可以有時間個別見吓朋友，一大班人都開心，但幾個人就可以傾深入啲。」

對於早前同好友梁靖琪食飯嘅靚相，網民焦點放喺兩人容貌狀態上，指比阿佘細7歲嘅梁靖琪狀態竟不及對方。阿佘就大讚對方新髮型好睇，話佢係陽光女孩型，同自己唔同風格，唔應該比較。阿佘又透露向來鍾意收藏首飾，婆婆送嘅翡翠首飾一直珍藏至今，仲自爆4歲時見媽媽戴耳環覺得好靚，要求媽媽帶佢穿耳，人生第一對耳環仲保存喺屋企：「媽咪話穿耳好痛，我話唔怕，對耳環係我自己揀，心型㗎好閃！」阿佘鍾情戒指，平日手上冇戴戒指會「周身唔聚財」，試過出門後發現忘記戴，即時喺街上搵首飾店即買即戴。被問到拍劇要除戒指點算，佢笑稱拍劇時自己係另一個人，唔使擔心。家中戒指不計其數，當中包括前度所送，亦有拒絕過追求者送戒指，因為對方「意思太重」。

同場嘅蔡潔表示一直好想同阿佘合作，之前客串《新聞女王2》只係同童年版阿佘做對手，笑言若有機會，即使演阿佘媽媽都唔介意：「因為阿佘真係保養得好好，之前成日聽蔣祖蔓講同佢拍戲嘅經驗，好羨慕。」講到同陳瀅開完音樂會，蔡潔話信心大咗，但未敢自己開騷。對於《中年好聲音》，佢坦言參賽者實力太強，自己未必應付到，要向參加咗嘅劉佩玥取經。TVB