《愛．回家》停拍︱「賈名媛」邱芷微不捨九年情 搵「細龍生」鄭世豪開騷圓夢

TVB長壽處境劇《愛．回家之開心速遞》即將停拍，劇中與「大小姐」林淑敏鬥法嘅「賈名媛」邱芷微（Chelffy）接受訪問時，話知道消息後大感不捨：「畢竟喺呢個劇組合作咗9年，大家互相照顧，早已培養出感情。不過我尊重公司決定，衷心感謝台前幕後所有同事嘅努力，更感謝觀眾一直以嚟嘅支持。希望之後有機會再遇到一個令觀眾再熟悉我嘅角色，我會繼續用心演好每個角色，期待將來喺其他演出見到大家。」

日前邱芷微夥拍「細龍生」鄭世豪同吳大強，喺啟德郵輪碼頭舉行迷你音樂會。邱芷微透露，同鄭世豪喺《愛．回家》從未試過有對手戲，今次籌備音樂活動時第一時間就想起對方，兩人合唱國語金曲《無言的結局》，贏得全場掌聲。邱芷微話，自己4、5歲時曾同媽媽合唱過呢首歌，媽媽唱男聲，佢負責女聲，自此對唱歌產生興趣。音樂會當日芷微媽媽都有到場，聽到阿女唱得好，特別感動。TVB