黃宗澤、陳瀅飛芭堤雅開工 Bosco感覺十分寫意. 邵氏藝人黃宗澤（Bosco）、陳瀅、吳業坤及胡鴻鈞近日到泰國芭堤雅出席活動，同當地粉絲會面，全場坐滿2,000人，場面墟冚。甫登場即引起哄動嘅Bosco，同觀眾分享成為「凍齡男神」嘅保養心得，包括健康、自律同保持好心態。適逢前日係「520」情人節，佢同陳瀅合體擺出心心手勢，默契十足！陳瀅、吳業坤同胡鴻鈞為活動擔任表演嘉賓，身穿背心短裙嘅陳瀅上台唱歌時自信十足，再同兩男合唱《友共情》，台下歡呼聲與掌聲不絕。

Bosco話此行感覺十分寫意，笑言：「寓工作於娛樂，梗係順便游吓水，仲曬埋太陽添，日日都開工就最好，520有工開，521又有工開。跟住會飛去第二度繼續工作。」陳瀅亦大讚今次芭堤雅之旅：「喺520當日可以同3位型男一齊工作又有娛樂，仲可以抽少少時間享受吓泰國嘅美食、文化，同感受吓呢度嘅好天氣，所以呢幾日真係好開心！」

吳業坤亦話今次工作充滿度假感：「可以工作之餘又有娛樂，真係好開心，同埋啲觀眾好熱情，希望以後多啲咁嘅工作就最好啦！」至於首次到訪芭堤雅嘅胡鴻鈞就話：「雖然天氣真係好熱，但有嗰種陽光與海灘度假嘅感覺，真係唔似嚟工作，似成班同事一齊去團建咁，而且又可以同大家一齊共度甜蜜浪漫嘅節日。」TVB