Wemby上咗人生最寶貴一課｜紐約力搏絕對優勢返主場未放鬆

如果單睇比數，馬刺雖然再輸一場，但只係一分飲恨，理應難以苛責，但原因係Wemby末段太心急而傳球失誤，卻令人擔心佢哋嘅心理狀況，能否繼續支持落去；尤其係未來兩仗都要作客聲勢浩大嘅麥迪遜花園球場，假如有崩潰跡象，咁比賽就提早完結。

紐約力搏已經喺季後賽13連勝，長達43天未嘗一敗，咁係好事亦都係壞事，目前佢哋嘅氣勢到達頂峰，士氣同信心亦遠勝馬刺，所以年輕嘅銀黑兵團要先冷靜落來，唸唸今場嘅輸波原因。其實喺傳失之前，如果罰球射好一點，box out做多一點，已經可能將戰果改寫。

年輕嘅球隊打入總決賽，多數要交學費，內文寫嘅三隊，雖然最後全部輸波，但好似雷霆同魔術，其實都有可勝之機，只係機會一瞬即逝，把握唔到，就將冠軍斷送，馬刺目前正處於呢個臨界點上。

老友H提到（此H不同彼H，勿誤會），紐約力搏嘅維拉路華三子經過March Madness洗禮，心態上更加成熟同無所畏懼，誠非虛言。

//1995年嘅魔術、2007年嘅騎士，以及2012年嘅雷霆，同樣係年輕球隊打入總決賽，最終全部鎩羽而歸，證明咗經驗有幾重要。今場馬刺一度喺末段反先，但關鍵時刻Wemby嘅致命失誤，令馬刺以104-105飲恨，主場全輸後落後到0-2。呢場馬刺末段嘅靈光一閃，曾經將紐約力搏壓制，可惜全場太多細節做得唔夠好，如籃板同罰球都喺水準之下，就算減少咗單打獨鬥，喺進攻嘅耐性同防守嘅專注上，都有改善空間。

經過上仗之敗，馬刺今日已不容有失，否則帶住兩場敗仗到紐約，等於提早玩完，所以無論係對謝倫賓遜（Jalen Brunson）嘅包夾，還係籃板時嘅拚勁，都遠勝首戰。至於紐約力搏初段就靠JB得分，睇來佢嘅腳傷的確已冇咩大礙。初段Wemby未有刻意進攻，更多係用自身吸引力來制造機會。而「香檳哥」甘柏尼（Julian Champagine）就因此喺外線連番得手，包括一球與麥拜迪（Miles McBride）相似嘅零度位擦板三分，希望呢個都係一個好兆頭。//

文章擇自- 仙道彬手記🏀