大奇蹟日創29分逆轉勝｜紐約力搏值得總冠軍

賽後收到海量信息，有好心嘅安慰，亦有唔少嘲笑霍斯（De'Aaron Fox）愚不可及…

贏波唔會係一人之功，輸波亦唔會係一個人嘅問題。見到「狐狸」心急上籃，當然失望兼憤怒，但領先達29分仍然被人逆轉，就暴露咗好多年輕球隊嘅問題，喺最後幾分鐘已經係等待自爆嘅狀態，完全失去信心，連基本嘅罰球、卡位及防守都不斷犯錯。而下半場嘅進攻方式，都有好大問題，相信密治莊遜（Mitch Johnson）有提點過球員，無奈佢哋以為大把喺手，冇唸過紐約力搏嘅韌力會咁強。

謝倫賓遜（Jalen Brunson）無論落後幾多，一直信心十足，OG下半場就吹響反攻號角，最後飛身補籃，更可能係總決賽歷史上嘅十大金球。呢支強悍嘅紐約力搏打出永不放棄嘅籃球，的確值得一座總冠軍。

睇完今場比賽，唯一慶幸係心臟功能良好，冇激到暈低… 如果說2013年G6之敗，係因為雷阿倫（Ray Allen）太神，咁今場輸波，就只能怪自己技不如人。

//喺麥迪遜上演嘅總決賽G4，再次成為焦點，麥克布朗（Mike Brown）賽前公開質疑裁判不公，加上Wemby推人逃過秋後算帳，令整個網路升溫；紐約主流媒體甚至以「惡棍」作稱呼，發出「通緝令」，難怪賽前介紹已傳來陣陣噓聲，亦令呢場大戰更受矚目。紐約力搏喺一度落後29分下冷靜作戰，下半場全力反撲，最後憑安奴比（OG Anunoby）飛身補籃奠勝，終以107-106逆轉成功。紐約力搏贏波後已領先至3-1，士氣差天共地，睇來捧盃已經係時間上嘅問題。

擊倒雷霆之後，馬刺本來係以初生之犢不畏虎嘅姿態挑戰紐約力搏，但上場因為Wemby出手推低謝倫賓遜，加上卡斯圖（Stephon Castle）同樣撞跌JB，忽然之間，網路上全部都係惡名。紐約力搏教練麥克布朗賽後特別指出，佢哋同馬刺下半場嘅罰球數目為8 vs 24，喺總決賽出現如此唔公平嘅情況，前所未見。//

文章擇自- 仙道彬手記🏀