陳浚霆自嘲《愛回家》完結後將失業 回應古佩玲搬離熊家：唔評論.無綫處境劇《愛·回家之開心速遞》即將進入尾聲，新處境劇《愛·回家之三代同糖》已開始「埋班」籌備，引來網民熱議。陳浚霆日前出席劇集宣傳活動時，接受《香港01》訪問大方回應傳聞，仲就拍檔古佩玲即將搬離「熊家」一事發表看法。

對於《開心速遞》是否即將大結局，陳浚霆笑言自己都係睇報道先知：「我都唔知呀，我聽你哋講係7月中嘛！你哋準過我哋呀！」講到新劇《三代同糖》已開始「埋班」，佢幽默自嘲即將面臨失業：「我遲啲就會係失業囉！新嗰套無份呀，會休息一下先，然後睇下有啲咩其他發展。我相信公司安排好晒，去新範疇試下新嘗試。」佢續指同TVB仲有長約，所以唔擔心前途，又話由《開心速遞》第一集至今參與咗九年多，自己都走入咗「舒適圈」，正好趁機會跳出嚟試新嘢。

陳浚霆透露已計劃去旅行充電，因為好耐冇搭過飛機，會同屋企人夾時間。至於會否同緋聞女友兼拍檔古佩玲一齊外遊，佢話兩人私下已約好帶愛犬聚會：「我同佢有啲活動要搞，講咗好耐帶啲狗一齊出嚟，完咗劇我哋啲狗要見一見大家先。」佢又透露古佩玲近期工作滿檔，明日仲有商場活動。

近期劇情講到古佩玲飾演嘅「神婆」即將搬離熊家，網民反應激烈，高呼「終於等到呢一日」。陳浚霆力撐拍檔，認為劇情轉變好正常：「熊家個轉變好正常，我係第一個非熊家住宿者住入熊家㗎嘛，我嗰時住樓梯底嘅。劇集不斷會有人搬入搬出，編劇喺呢個時間寫咗好多精彩嘅嘢。」至於古佩玲有冇得入新劇，佢話唔知，要問返佢本人。對於網民嘅熱烈反應，佢只簡單回應：「我唔評論。」TVB