藝人文凱玲（Connie）早前回歸演藝事業，一口氣接了兩部劇集，一部於橫店拍攝的短劇《報仇》，另一部則是正於天津拍攝的劇集《惹惹販子》，雖然生B後已有3年沒有拍戲，但一點也沒有生疏，於橫店拍攝《報》劇，更瞓身打到遍體鱗傷：「因為呢部係一部動作劇，打到飛起，不過正確啲講，應該係我被打到飛起，拍完之後，我膝蓋、手都又瘀又腫，但見到Playback出嚟效果好好，幾辛苦都值得。」

完成《報》劇後，Connie便到天津開工，因適逢囡囡生日，劇組十分窩心，特別安排了兩日假期給Connie：「佢哋真係好好，其實出發之前我都有提前同囡囡慶生，去到天津，劇組安排到兩日假期畀我，我都即刻返去同囡囡過生日，好開心。」

Connie現正拍攝《惹惹販子》，因是一部喜劇，相對較輕鬆，Connie還笑台前幕後都很融洽，記得有一日，拍攝講到有關食三文魚的對白，之後收工大家真的相約一齊去食三文魚，令她覺得十分搞笑，果然言出必行。