《2026香港小姐競選》經過上月底到湖南嘅外景拍攝後，繼續投入連串訓練，星期日亦再一次出發，到廣東從化為另一次外景取景。12位佳麗中午抵達當地後，換上一身型爆賽車服，於當地嘅國際賽車場，大騷佢哋未曾展示過嘅英姿颯颯一面。
11號顏懿菲 受訪時提到雖然打扮非常有型，不過自己其實唔太大膽，亦笑指唔太敢接受太快嘅速度。而 12號湯家琳 就非常享受駕駛樂趣，並且渴望有機會親自落場，體驗真實賽道上嘅飛馳快感。而 7號楊媛媛 就透露自己大愛賽車遊戲，今次到訪國際賽車場令佢覺得非常興奮咁話。
至於 8號鄧匡閔 同 10號陳梓穎 一同接受訪問，鄧匡閔提到呢次喺賽車場拍攝機會難得，又期待有機會喺賽道上感受速度。兩人仲提到為明日嘅泳裝做足準備，對上次泳裝自己體態唔滿意嘅Ada，指最近以戒調咪料改善身形，而Cecilia就笑言自己自湖南外景返港後胃口變大，所以非常努力忍口呀。
今晚各位佳麗將換上一身靚衫參與晚宴，而聽日一早，12位佳麗就會到有「嶺南第一溫泉」之稱嘅溫泉區，再次以泳裝展示佢哋嘅迷人身段。
