意大利足總主席馬拿高確認雲尼亞里係意大利足總新技術總監嘅人選，而文仙尼將會回歸，再度成為國家隊新教練。兩位將會喺聽日召開記者會…

至於馬拿高喺Federal Council 會議之後召開記者會👇

佢確認之前喺馬甸尼同李安納度嘅支持下確立咗一位國家隊教練人選，並且達成某程度上嘅共識，而最終不批准相關任命係佢嘅選擇，佢本身完全唔知道派路同 Fonbet 嘅合作，當佢表明立場之後，馬甸尼亦都提出另一種睇法，顯然佢對所發生嘅事情感到失望，但係喺呢件事上面佢自己嘅立場係明確而堅定，而馬甸尼嘅取態亦都一樣，之後佢哋冷靜地協議分道揚鑣。

馬拿高覺得時間緊迫，並且相信文仙尼係最合適嘅國家隊新教練選擇，而呢個決定佢已經告知新任技術總監雲尼亞里，不過唔好混淆，技術總監呢個角色唔會消失。

呢位意大利足總主席仲表示希望喺今個週未公布第三位成員嘅任命，就係一位協調員，會負責管理成年國家隊同埋青年梯隊，呢個角色以往 Riva 擔任過。

馬拿高亦都表示文仙尼同雲尼亞里喺待遇要求持開放同正面態度，要求係屬於足總可以接受同負擔嘅範圍。關於任命捷連尼作為技術總監嘅可能性，馬拿高表示佢嘅做法係唔會搵一啲現時喺意甲球會身居要職嘅人選 。

提到文仙尼過往離開意大利國家隊嘅做法，馬拿高表示過往嘅經歷佢係有考量過、評估過，而表示歉意亦都重要，呢個係聽日相關記者會召開嘅前提。