【娛樂新聞】《三代同糖》AI餐廳背景劣評如潮 網民對比《開心速遞》初戀Cafe：用返廠景咪好.TVB全新處境劇《愛．回家之三代同糖》首播後，劇情未算引起迴響，反而第3集劇中採用大量AI生成背景，被網民狠批「假到離譜」。播出的畫面上，車婉婉、吳若希等演員身處的餐廳背景被指不自然，包括光影錯亂、人物與背景邊緣模糊及缺乏陰影等問題，隨即引起網上熱討。有網民在社交平台發出截圖，直言「廠景都懶得搭」，留言區負評居多，紛紛指出「假到冇影冇腳」、「80年代啲布景都好過佢」、「執咗佢連呢四個友都慳埋仲好」。

亦有網民將《三代同糖》的AI餐廳背景，跟《開心速遞》的「初戀Cafe」等真實廠景做對比，明顯這次AI製作未夠火候，令不少人失望，大都認為「用返廠景咪好囉」、「樸素，仲好」、「搭景齊道具係你唯一優勢，依家就咁放棄咗佢？」對於使用AI背景，有網民估計是為了節省成本，笑言「窮到轉做AI中心」，亦有人揣測背後原因：「定連佢哋都唔知新劇玩幾耐頂住先？」不過，劣評如潮之際，亦有不少人表達正評：「節奏快想繼續追劇情」、「其實都幾好睇」、「非常有新鮮感」。新劇能否挽回觀眾信心，仍有待觀察。TVB