高海寧透露《新聞女王》「許詩晴」外傳今年開拍陳曉華望有份參與.高海寧（高Lin
高海寧透露《新聞女王》「許詩晴」外傳今年開拍陳曉華望有份參與.高海寧（高Ling）為無綫主持嘅節目《Grand住享樂人生》近日舉行記者會，佢同節目嘉賓陳曉華（Hera）、黃佩霞、陳嘉容齊齊現身將軍澳電視城。高Ling喺節目中同Hera一齊去咗香港嘅「世一」酒吧，兩人把酒談心，傾得好開心，仲大談旅行話題。Hera話自己成日追高Ling嘅社交網，好想學佢一個人去旅行。【高Ling鼓勵一個人旅行：師傅話人生最緊要體驗】高Ling就話，自己以前做咩都冇勇氣，但多得朋友包括師傅蘇民峰鼓勵：「師傅話人生最緊要係體驗，要多啲去旅行見識世界。」佢仲話一個人旅行其實唔係太難，自己去過南法、南意、哥本哈根：「第一次一個人去旅行係好焦慮，行程plan得好細緻，但去過之後就發覺冇咁得人驚。今次去哥本哈根淨係訂咗頭兩晚酒店，每日再去計劃。」問到一個人旅行有冇艷遇，高Ling就話：「有，但都係女仔，可能去博物館多，自己鍾意撩女仔傾偈。有一日喺哥本哈根睇日落遇到個日本男仔，但大家都係靜靜地睇日落，有互相幫對方影相，但就冇攞聯絡，feel到佢係好I嘅人。」佢話自己唔接受異地戀，除非遇到一個人可以令佢為對方離開香港。講到最近去冰島睇極光仲浸溫泉，高Ling笑住話：「呢個係著名景點，去到個個都會咁做。」佢話今次係一家人去冰島旅行，每日要揸6至8個鐘車，多咗好多共處時間，感情比以前更加好，仲要晚晚見到極光，由唔識影變到識影。問到感情方面蘇師傅有冇贈言，高Ling話：「佢話一定要揀自己鍾意嘅，一係就佢鍾意你多啲、一係就有錢，我就揀自己鍾意，所以我單身咗咁多年，我係好麻煩，好難追，但我會堅持，一個人都好好，要遇到一個好真心鍾意先會一齊，做咩要委屈自己同唔鍾意嘅人一齊。」Hera聽完都大表贊同，仲話好期待同高Ling去旅行。講到兩人在節目中歎美食、蒲「世一」酒吧，把酒談心，可有喝醉？兩人皆指有醉意，高Ling笑說：「有呀，我唔飲得，飲咗1杯就醉。」【《新聞女王》外傳今年開拍高Ling：壓力係動力】劇集《新聞女王》大受歡迎，總監製鍾澍佳透露有意將高海寧劇中角色「許詩晴」開拍外傳。高Ling被問到幾時開拍，佢話：「應該今年，排緊期。（有咩班底？）我淨係知自己有份。（有冇孭飛壓力？）壓力幾時都有，每日做嘢都好有壓力，但係壓力都係動力。」陳曉華被問到可有份參與，佢就話：「我希望有啦，唐芷瑤再出現就好，跟高Ling學嘢。」睇嚟兩位都好期待有機會再合作！TVB
