藝人何沛珈近日成綜藝寵兒，先後主持《玩轉粵東粵北懶人包》、《周遊東涌》及《健康新聞報道》，她表示入行前曾當過註冊護士，故以往主持的綜藝節目多跟醫療及健康有關，近年較多拍攝旅遊節目，初時不太懂得帶動氣氛，幸從前輩薛家燕及周奕瑋身上學到不少技巧。
談到當護士最深刻的經歷，沛珈坦言一定是遺體處理：「做之前我以為自己會好驚，但做嘅時候，我知道自己係為死者去做最後一件事，如果我可以好好處理，係好大嘅功德，所以當我完成整個程序，我內心係好平靜同冇任何波瀾。」不過她只做了短短一年便轉行當藝人，問到會否因未能學以致用而覺浪費？沛珈揚言知識是一世：「每逢出埠都係我負責照顧大家嘅健康，家人有唔舒服，我都可以好快畀到意見，而且可能因為我嘅背景，最近仲做咗牙科機構嘅代言人添！」又指護士的工作經驗亦間接助她演戲：「做護士最污糟嘅嘢都處理過，後來拍任何節目都唔會再怕污糟嘢，記得拍《異空感應》時，講我死咗，我要瞓喺一條後巷，側邊有曱甴同老鼠，但我都照瞓落去。（會唔會想拍醫療劇？）想，之前《巨塔之後》有個角色搵我做外科醫生，但當時我接咗做奧運主持撞期，所以冇拍到。」不過，沛珈直言每當有經濟壓力時，也會想若有一份收入穩定的工作就不用如此辛苦，惟她很快又作出否定：「以前喺醫院見到生老病死，明白人嘅生命係好短暫，如果喺有生之年搵到自己嘅夢想，我覺得係值得，所以冇後悔。」
雖然無悔，但入行5年的沛珈，期間難免經歷艱難時刻，她坦言最難捱是經濟壓力：「因為我要供妹妹讀書，加上屋企之前發生啲事要用錢，一開始我會好焦慮，唔知點算，當一步步走過，回頭睇番都唔係好難捱。好多藝人話戶口得番雙位數，我都試過，因為要照顧屋企，要花費嘅嘢太多。（見到前護士同事已經高薪厚職會唔會有比較？）咁又冇，我覺得我返工好開心，做到自己鍾意嘅工作，公司畀好多機會我，識同好多朋友同前輩，好享受。」她稱現時總算捱過去，問到現在收入可算穩定時？她不諱言作為藝人在工作上較被動，所以她會主動出擊：「有時好靜，我都會𢱑撈，遇到相熟監製時會問吓有冇合適節目啱我做，都只係問多句啫，冇都唔會強求。（有冇因為咁而獲得工作機會？）有試過架！」講到目標，她望在主持方面可以獨當一面：「因為大部分嘅節目都係同其他主持一齊做，冇一個好代表到自己嘅節目，希望有機會做到。（如果開一個綜藝畀你，你想做咩節目？）想做同身心靈有關嘅節目，因為好多人都好大壓力，好多人都話依家環境市道唔好，其實任何年代，環境都係不停轉變，我哋只可以去改變自己。」
