祖殊赫特（Josh Hart）真係變卡魯素（Alex Caruso） 紐約人再下一城仍有懸念

來到季後賽，防守策略嘅大方向不外乎兩種，一係全力凍結主將，等角色球員主導；一係奇招放主將而切斷佢與隊友嘅連繫，再等待主將體力下降，其他人都會因為全場鮮有起手，難有貢獻。

騎士經過上仗心碎之敗，對謝倫賓遜（Jalen Brunson）唔敢再掉以輕心，由頭到尾都不斷包夾，甚至俾高佬隨時喺後面支援，總之就係徹底將佢凍結。從JB得分來睇，戰術相當成功，但騎士低估咗紐約力搏嘅整體實力同默契，結果JB嘅13次助攻，令隊友不斷得分，亦帶走咗勝利。當然麥克布朗（Mike Brown）早就唸到艾堅遜（Kenny Atkinson）會如此，全隊配合同走位明顯經過演練。

卡魯素挺身而出，突變雷霆頭兩仗嘅得分點，史畢達認為祖殊赫特嘅角色相似，亦好合理。騎士當下嘅進攻問題大於防守，就睇下返到主場如何解決。

//逆轉與被逆轉一方，士氣可以係天淵之別。所以騎士今仗能否重整旗鼓，等佢哋從上場領先22分後淪為笑柄嘅失敗者角色反彈，成為焦點。從戰略來睇，紐約力搏主力謝倫賓遜今仗大部份時間掙扎，連同垃圾時間嘅拋投才只得19分，可以話局部成功，但佢哋卻低估咗紐約力搏嘅團結，尤其係維拉路華同學會嘅默契，最終祖殊赫特大爆發攻入26分，成咗另一次贏波關鍵。

上半場主隊紐約力搏稍微領先4分，不過大部份球迷應該都唔會好在意，因為上場落後22分下能夠逆轉騎士，令人期待紐約再次打出果種令人驚歎嘅爆發力。JB上半場只得2分，不斷嘅包夾加上雙塔隨時準備在後，基本上封殺咗一切得分機會，而艾堅遜亦隱藏咗詹士夏登（James Harden），唔再俾佢再次成為JB嘅箭靶，就算遇擋亦不隨便換防，始終比起三分波，JB嘅中距離更加致命，呢一點應該球迷都好清楚。//

文章擇自- 仙道彬手記🏀