香港探秘地圖快閃活動 黎耀祥龔嘉欣組「嘉祥」組合有興趣開騷. 黎耀祥、龔嘉欣、丁子朗、倪嘉雯、潘靜文等今日（31日）現身尖沙咀，為熱播劇《香港探秘地圖》進行快閃宣傳。倪嘉雯著上劇中外星人造型，潘靜文扮女鬼，吸引大批粉絲圍觀。

黎耀祥與龔嘉欣受訪時提到，昨晚為張德蘭演唱會擔任嘉賓。龔嘉欣回憶十多年前首次到外地登台就係跟黎耀祥，當時對方將收到嘅利是分一半俾佢，令佢銘記至今。被問到會否介紹男生俾龔嘉欣，黎耀祥笑言責任重大唔敢亂介紹，但讚佢係好女仔，差不多時候結婚。龔嘉欣話將來結婚一定會請黎耀祥夫婦，即使旅行結婚都會邀請。黎耀祥搞笑引用《Lucky Star》歌詞回應：「就這樣我撒嬌，搞到張床搖搖，就這樣到破曉！」對於組「嘉祥」組合開騷，兩人笑指可以考慮。

倪嘉雯話外星人裝束用料薄，工作人員仲幫佢喺衫內裝風扇，唔怕中暑，戴埋頭套後冇人認得，覺得好好玩。潘靜文就大呻劇中跳舞畫面全被剪走，笑言可能跳得唔夠靚，但讚劇組剪接犀利。佢話朋友叫佢參加《魔音女團》，但自己係歌手怕拆招牌，身旁嘅倪嘉雯即笑問「你做乜望住我」，場面搞笑。

丁子朗透露原本係新男團「SURFIVE」嘅一份子，但深思後決定婉拒，認為拍劇最適合自己，會繼續專注演戲。佢話有聽過佢哋嘅新歌，亦有為團隊命名畀意見，精神上支持。佢早前加入內地短劇市場，笑言雖然自覺演霸道總裁有點嚇人，但內地觀眾好鍾意，所以樂意一試。TVB