96年亞姐冠軍陳煒夥拍宣萱合作台慶劇《巨塔之后》互鬥演技再成熱話。明年入行30年的她，接受電台訪問，父母份外痛錫她這位孻女，早於18歲時已希望她選港姐，她說：「嗰時太細個啦，一來覺得自己學歷唔夠，二來爸爸講嘅嘢唔聽。」入行後，經歷亞視低潮時，她對家人只報喜不報憂，及至08年退出娛圈4年，婚姻出現問題時，也沒告知雙親，她又說：「媽咪2009年開始肝癌，2011年離開，嗰陣除咗我返嚟香港，亦有接媽咪去台灣做Treatment，佢都有同我前夫一齊生活嘅時間。其實媽咪係睇到我同前夫點相處，好記得佢曾經講過一句『如果唔啱，分開啦。』聽到佢呢句，突然覺得佢好豁達，唔似以往我心目中忍耐爸爸嘅媽咪，所以最後我決定同前夫分開，都係因為媽媽呢句說話而釋懷。」

2012年，陳煒與台灣前夫離婚後回港復出轉投無綫，原來當現任丈夫陳醫生出現前數年，她一直心灰意冷：「講真，識我老公時已經47歲，嗰時好灰，感覺47歲可能真係冇人要啦，感情冇任何諗法，所有時間畀晒工作，用工作麻醉自己，唔好有時間諗嘢。」及至拍《法證先鋒IV》因黃智賢認識了老公，陳醫生的細心，令她由衷感動：「嗰時只係啱傾未拍拖，曾經有一日開工經痛，係痛到頭暈休克成身標冷汗好辛苦。當捱完朝早外景返屋企休息，我打電話問陳醫生應該食啲乜嘢藥。結果到中午，佢走咗嚟我屋企送藥，同埋送咗碗粥，覺得佢真係關心我喎，先至慢慢開始。」

陳煒90歲的爸爸於2022年初病逝，她慶幸當時有另一半陪伴外，亦感激對方愛屋及烏：「之前爸爸坐骨神經痛到行唔到，我開工冇時間，陳醫生係特登響Lunch Break由將軍澳去到屯門，照顧我爸爸同幫佢打針，每日睇住佢，我真係好感激我老公。」

陳煒說過跟台灣前夫的婚姻失敗是缺乏溝通，而她與現任丈夫都經歷過一段婚姻，她發現與陳醫生最夾就是「咩都攤開講」:「雖然我同佢都好I （內向型人格），但我哋相處會無所不談，每日發生嘅嘢都分享，佢好清楚我，我又好清楚佢，大家就唔使估嚟估去，我所有拍戲拍檔，尤其係男對手，都一定會識得我老公。」雖然一拍拖就認定對方，但她笑老公於她48歲生日才求婚是有點遲，她說：「事前冇傾過，但少少Feel到，唔踢爆佢啫。點Feel到？47歲已經覺得係佢啦，哈哈！遲咗一年喇，因為大家都認定咗對方，要猶豫要諗係最初拍拖階段，觀察佢一段時間，已經決定好啦，爭在佢未求婚啫。」問夫妻二人婚前有沒有想過有下一代，她說：「佢自己有下一代啦，我真係冇乜點諗過，依家我哋兩個幾自由呀。」